{"id":"mn1","nikaya":"mn","number":"1","subnumber":null,"layer":"root","title_pli":"Majjhima Nikāya 1 Mūlapariyāyasutta","vri_vols":["12"],"sya_vols":["12"],"segment_count":334,"navigation":{"prev":null,"next":{"id":"mn2","title_pli":"Majjhima Nikāya 2 Sabbāsavasutta"},"nikaya":"mn"},"has_translation_th":false,"segments":[{"id":"mn1:0.1","pli":"Majjhima Nikāya 1"},{"id":"mn1:0.2","pli":"Mūlapariyāyasutta"},{"id":"mn1:1.1","pli":"Evaṁ me sutaṁ—","cite":{"vri":["12.1"],"sya":["12.1"],"pts-vp-pli":["1.1"],"msdiv":["1"]}},{"id":"mn1:1.2","pli":"ekaṁ samayaṁ bhagavā ukkaṭṭhāyaṁ viharati subhagavane sālarājamūle."},{"id":"mn1:1.3","pli":"Tatra kho bhagavā bhikkhū āmantesi:"},{"id":"mn1:1.4","pli":"“bhikkhavo”ti."},{"id":"mn1:1.5","pli":"“Bhadante”ti te bhikkhū bhagavato paccassosuṁ."},{"id":"mn1:1.6","pli":"Bhagavā etadavoca:"},{"id":"mn1:2.1","pli":"“sabbadhammamūlapariyāyaṁ vo, bhikkhave, desessāmi."},{"id":"mn1:2.2","pli":"Taṁ suṇātha, sādhukaṁ manasi karotha, bhāsissāmī”ti."},{"id":"mn1:2.3","pli":"“Evaṁ, bhante”ti kho te bhikkhū bhagavato paccassosuṁ."},{"id":"mn1:2.4","pli":"Bhagavā etadavoca:"},{"id":"mn1:3.1","pli":"“Idha, bhikkhave, assutavā puthujjano ariyānaṁ adassāvī ariyadhammassa akovido ariyadhamme avinīto, sappurisānaṁ adassāvī sappurisadhammassa akovido sappurisadhamme avinīto—","cite":{"vri":["12.2"],"sya":["12.2"],"msdiv":["2"]}},{"id":"mn1:3.2","pli":"pathaviṁ pathavito sañjānāti;"},{"id":"mn1:3.3","pli":"pathaviṁ pathavito saññatvā pathaviṁ maññati, pathaviyā maññati, pathavito maññati, pathaviṁ meti maññati, pathaviṁ abhinandati."},{"id":"mn1:3.4","pli":"Taṁ kissa hetu?"},{"id":"mn1:3.5","pli":"‘Apariññātaṁ tassā’ti vadāmi."},{"id":"mn1:4.1","pli":"Āpaṁ āpato sañjānāti;"},{"id":"mn1:4.2","pli":"āpaṁ āpato saññatvā āpaṁ maññati, āpasmiṁ maññati, āpato maññati, āpaṁ meti maññati, āpaṁ abhinandati."},{"id":"mn1:4.3","pli":"Taṁ kissa hetu?"},{"id":"mn1:4.4","pli":"‘Apariññātaṁ tassā’ti vadāmi."},{"id":"mn1:5.1","pli":"Tejaṁ tejato sañjānāti;"},{"id":"mn1:5.2","pli":"tejaṁ tejato saññatvā tejaṁ maññati, tejasmiṁ maññati, tejato maññati, tejaṁ meti maññati, tejaṁ abhinandati."},{"id":"mn1:5.3","pli":"Taṁ kissa hetu?"},{"id":"mn1:5.4","pli":"‘Apariññātaṁ tassā’ti vadāmi."},{"id":"mn1:6.1","pli":"Vāyaṁ vāyato sañjānāti;","cite":{"pts-vp-pli":["1.2"]}},{"id":"mn1:6.2","pli":"vāyaṁ vāyato saññatvā vāyaṁ maññati, vāyasmiṁ maññati, vāyato maññati, vāyaṁ meti maññati, vāyaṁ abhinandati."},{"id":"mn1:6.3","pli":"Taṁ kissa hetu?"},{"id":"mn1:6.4","pli":"‘Apariññātaṁ tassā’ti vadāmi."},{"id":"mn1:7.1","pli":"Bhūte bhūtato sañjānāti;","cite":{"msdiv":["3"]}},{"id":"mn1:7.2","pli":"bhūte bhūtato saññatvā bhūte maññati, bhūtesu maññati, bhūtato maññati, bhūte meti maññati, bhūte abhinandati."},{"id":"mn1:7.3","pli":"Taṁ kissa hetu?"},{"id":"mn1:7.4","pli":"‘Apariññātaṁ tassā’ti vadāmi."},{"id":"mn1:8.1","pli":"Deve devato sañjānāti;"},{"id":"mn1:8.2","pli":"deve devato saññatvā deve maññati, devesu maññati, devato maññati, deve meti maññati, deve abhinandati."},{"id":"mn1:8.3","pli":"Taṁ kissa hetu?"},{"id":"mn1:8.4","pli":"‘Apariññātaṁ tassā’ti vadāmi."},{"id":"mn1:9.1","pli":"Pajāpatiṁ pajāpatito sañjānāti;"},{"id":"mn1:9.2","pli":"pajāpatiṁ pajāpatito saññatvā pajāpatiṁ maññati, pajāpatismiṁ maññati, pajāpatito maññati, pajāpatiṁ meti maññati, pajāpatiṁ abhinandati."},{"id":"mn1:9.3","pli":"Taṁ kissa hetu?"},{"id":"mn1:9.4","pli":"‘Apariññātaṁ tassā’ti vadāmi."},{"id":"mn1:10.1","pli":"Brahmaṁ brahmato sañjānāti;","cite":{"vri":["12.3"],"sya":["12.3"]}},{"id":"mn1:10.2","pli":"brahmaṁ brahmato saññatvā brahmaṁ maññati, brahmasmiṁ maññati, brahmato maññati, brahmaṁ meti maññati, brahmaṁ abhinandati."},{"id":"mn1:10.3","pli":"Taṁ kissa hetu?"},{"id":"mn1:10.4","pli":"‘Apariññātaṁ tassā’ti vadāmi."},{"id":"mn1:11.1","pli":"Ābhassare ābhassarato sañjānāti;"},{"id":"mn1:11.2","pli":"ābhassare ābhassarato saññatvā ābhassare maññati, ābhassaresu maññati, ābhassarato maññati, ābhassare meti maññati, ābhassare abhinandati."},{"id":"mn1:11.3","pli":"Taṁ kissa hetu?"},{"id":"mn1:11.4","pli":"‘Apariññātaṁ tassā’ti vadāmi."},{"id":"mn1:12.1","pli":"Subhakiṇhe subhakiṇhato sañjānāti;"},{"id":"mn1:12.2","pli":"subhakiṇhe subhakiṇhato saññatvā subhakiṇhe maññati, subhakiṇhesu maññati, subhakiṇhato maññati, subhakiṇhe meti maññati, subhakiṇhe abhinandati."},{"id":"mn1:12.3","pli":"Taṁ kissa hetu?"},{"id":"mn1:12.4","pli":"‘Apariññātaṁ tassā’ti vadāmi."},{"id":"mn1:13.1","pli":"Vehapphale vehapphalato sañjānāti;"},{"id":"mn1:13.2","pli":"vehapphale vehapphalato saññatvā vehapphale maññati, vehapphalesu maññati, vehapphalato maññati, vehapphale meti maññati, vehapphale abhinandati."},{"id":"mn1:13.3","pli":"Taṁ kissa hetu?"},{"id":"mn1:13.4","pli":"‘Apariññātaṁ tassā’ti vadāmi."},{"id":"mn1:14.1","pli":"Abhibhuṁ abhibhuto sañjānāti;"},{"id":"mn1:14.2","pli":"abhibhuṁ abhibhuto saññatvā abhibhuṁ maññati, abhibhusmiṁ maññati, abhibhuto maññati, abhibhuṁ meti maññati, abhibhuṁ abhinandati."},{"id":"mn1:14.3","pli":"Taṁ kissa hetu?"},{"id":"mn1:14.4","pli":"‘Apariññātaṁ tassā’ti vadāmi."},{"id":"mn1:15.1","pli":"Ākāsānañcāyatanaṁ ākāsānañcāyatanato sañjānāti;","cite":{"sya":["12.4"],"msdiv":["4"]}},{"id":"mn1:15.2","pli":"ākāsānañcāyatanaṁ ākāsānañcāyatanato saññatvā ākāsānañcāyatanaṁ maññati, ākāsānañcāyatanasmiṁ maññati, ākāsānañcāyatanato maññati, ākāsānañcāyatanaṁ meti maññati, ākāsānañcāyatanaṁ abhinandati."},{"id":"mn1:15.3","pli":"Taṁ kissa hetu?"},{"id":"mn1:15.4","pli":"‘Apariññātaṁ tassā’ti vadāmi."},{"id":"mn1:16.1","pli":"Viññāṇañcāyatanaṁ viññāṇañcāyatanato sañjānāti;","cite":{"vri":["12.4"],"pts-vp-pli":["1.3"]}},{"id":"mn1:16.2","pli":"viññāṇañcāyatanaṁ viññāṇañcāyatanato saññatvā viññāṇañcāyatanaṁ maññati, viññāṇañcāyatanasmiṁ maññati, viññāṇañcāyatanato maññati, viññāṇañcāyatanaṁ meti maññati, viññāṇañcāyatanaṁ abhinandati."},{"id":"mn1:16.3","pli":"Taṁ kissa hetu?"},{"id":"mn1:16.4","pli":"‘Apariññātaṁ tassā’ti vadāmi."},{"id":"mn1:17.1","pli":"Ākiñcaññāyatanaṁ ākiñcaññāyatanato sañjānāti;"},{"id":"mn1:17.2","pli":"ākiñcaññāyatanaṁ ākiñcaññāyatanato saññatvā ākiñcaññāyatanaṁ maññati, ākiñcaññāyatanasmiṁ maññati, ākiñcaññāyatanato maññati, ākiñcaññāyatanaṁ meti maññati, ākiñcaññāyatanaṁ abhinandati."},{"id":"mn1:17.3","pli":"Taṁ kissa hetu?"},{"id":"mn1:17.4","pli":"‘Apariññātaṁ tassā’ti vadāmi."},{"id":"mn1:18.1","pli":"Nevasaññānāsaññāyatanaṁ nevasaññānāsaññāyatanato sañjānāti;"},{"id":"mn1:18.2","pli":"nevasaññānāsaññāyatanaṁ nevasaññānāsaññāyatanato saññatvā nevasaññānāsaññāyatanaṁ maññati, nevasaññānāsaññāyatanasmiṁ maññati, nevasaññānāsaññāyatanato maññati, nevasaññānāsaññāyatanaṁ meti maññati, nevasaññānāsaññāyatanaṁ abhinandati."},{"id":"mn1:18.3","pli":"Taṁ kissa hetu?"},{"id":"mn1:18.4","pli":"‘Apariññātaṁ tassā’ti vadāmi."},{"id":"mn1:19.1","pli":"Diṭṭhaṁ diṭṭhato sañjānāti;","cite":{"msdiv":["5"]}},{"id":"mn1:19.2","pli":"diṭṭhaṁ diṭṭhato saññatvā diṭṭhaṁ maññati, diṭṭhasmiṁ maññati, diṭṭhato maññati, diṭṭhaṁ meti maññati, diṭṭhaṁ abhinandati."},{"id":"mn1:19.3","pli":"Taṁ kissa hetu?"},{"id":"mn1:19.4","pli":"‘Apariññātaṁ tassā’ti vadāmi."},{"id":"mn1:20.1","pli":"Sutaṁ sutato sañjānāti;","cite":{"sya":["12.5"]}},{"id":"mn1:20.2","pli":"sutaṁ sutato saññatvā sutaṁ maññati, sutasmiṁ maññati, sutato maññati, sutaṁ meti maññati, sutaṁ abhinandati."},{"id":"mn1:20.3","pli":"Taṁ kissa hetu?"},{"id":"mn1:20.4","pli":"‘Apariññātaṁ tassā’ti vadāmi."},{"id":"mn1:21.1","pli":"Mutaṁ mutato sañjānāti;"},{"id":"mn1:21.2","pli":"mutaṁ mutato saññatvā mutaṁ maññati, mutasmiṁ maññati, mutato maññati, mutaṁ meti maññati, mutaṁ abhinandati."},{"id":"mn1:21.3","pli":"Taṁ kissa hetu?"},{"id":"mn1:21.4","pli":"‘Apariññātaṁ tassā’ti vadāmi."},{"id":"mn1:22.1","pli":"Viññātaṁ viññātato sañjānāti;"},{"id":"mn1:22.2","pli":"viññātaṁ viññātato saññatvā viññātaṁ maññati, viññātasmiṁ maññati, viññātato maññati, viññātaṁ meti maññati, viññātaṁ abhinandati."},{"id":"mn1:22.3","pli":"Taṁ kissa hetu?"},{"id":"mn1:22.4","pli":"‘Apariññātaṁ tassā’ti vadāmi."},{"id":"mn1:23.1","pli":"Ekattaṁ ekattato sañjānāti;","cite":{"vri":["12.5"],"msdiv":["6"]}},{"id":"mn1:23.2","pli":"ekattaṁ ekattato saññatvā ekattaṁ maññati, ekattasmiṁ maññati, ekattato maññati, ekattaṁ meti maññati, ekattaṁ abhinandati."},{"id":"mn1:23.3","pli":"Taṁ kissa hetu?"},{"id":"mn1:23.4","pli":"‘Apariññātaṁ tassā’ti vadāmi."},{"id":"mn1:24.1","pli":"Nānattaṁ nānattato sañjānāti;"},{"id":"mn1:24.2","pli":"nānattaṁ nānattato saññatvā nānattaṁ maññati, nānattasmiṁ maññati, nānattato maññati, nānattaṁ meti maññati, nānattaṁ abhinandati."},{"id":"mn1:24.3","pli":"Taṁ kissa hetu?"},{"id":"mn1:24.4","pli":"‘Apariññātaṁ tassā’ti vadāmi."},{"id":"mn1:25.1","pli":"Sabbaṁ sabbato sañjānāti;","cite":{"pts-vp-pli":["1.4"]}},{"id":"mn1:25.2","pli":"sabbaṁ sabbato saññatvā sabbaṁ maññati, sabbasmiṁ maññati, sabbato maññati, sabbaṁ meti maññati, sabbaṁ abhinandati."},{"id":"mn1:25.3","pli":"Taṁ kissa hetu?"},{"id":"mn1:25.4","pli":"‘Apariññātaṁ tassā’ti vadāmi."},{"id":"mn1:26.1","pli":"Nibbānaṁ nibbānato sañjānāti;","cite":{"sya":["12.6"]}},{"id":"mn1:26.2","pli":"nibbānaṁ nibbānato saññatvā nibbānaṁ maññati, nibbānasmiṁ maññati, nibbānato maññati, nibbānaṁ meti maññati, nibbānaṁ abhinandati."},{"id":"mn1:26.3","pli":"Taṁ kissa hetu?"},{"id":"mn1:26.4","pli":"‘Apariññātaṁ tassā’ti vadāmi."},{"id":"mn1:26.5","pli":"Puthujjanavasena paṭhamanayabhūmiparicchedo niṭṭhito."},{"id":"mn1:27.1","pli":"Yopi so, bhikkhave, bhikkhu sekkho appattamānaso anuttaraṁ yogakkhemaṁ patthayamāno viharati, sopi pathaviṁ pathavito abhijānāti;","cite":{"msdiv":["7"]}},{"id":"mn1:27.2","pli":"pathaviṁ pathavito abhiññāya pathaviṁ mā maññi, pathaviyā mā maññi, pathavito mā maññi, pathaviṁ meti mā maññi, pathaviṁ mābhinandi."},{"id":"mn1:27.3","pli":"Taṁ kissa hetu?"},{"id":"mn1:27.4","pli":"‘Pariññeyyaṁ tassā’ti vadāmi."},{"id":"mn1:28.1","pli":"Āpaṁ …pe…","cite":{"vri":["12.6"]}},{"id":"mn1:29.1","pli":"tejaṁ …"},{"id":"mn1:30.1","pli":"vāyaṁ …"},{"id":"mn1:31.1","pli":"bhūte …"},{"id":"mn1:32.1","pli":"deve …"},{"id":"mn1:33.1","pli":"pajāpatiṁ …"},{"id":"mn1:34.1","pli":"brahmaṁ …"},{"id":"mn1:35.1","pli":"ābhassare …"},{"id":"mn1:36.1","pli":"subhakiṇhe …"},{"id":"mn1:37.1","pli":"vehapphale …"},{"id":"mn1:38.1","pli":"abhibhuṁ …"},{"id":"mn1:39.1","pli":"ākāsānañcāyatanaṁ …"},{"id":"mn1:40.1","pli":"viññāṇañcāyatanaṁ …"},{"id":"mn1:41.1","pli":"ākiñcaññāyatanaṁ …"},{"id":"mn1:42.1","pli":"nevasaññānāsaññāyatanaṁ …"},{"id":"mn1:43.1","pli":"diṭṭhaṁ …"},{"id":"mn1:44.1","pli":"sutaṁ …"},{"id":"mn1:45.1","pli":"mutaṁ …"},{"id":"mn1:46.1","pli":"viññātaṁ …"},{"id":"mn1:47.1","pli":"ekattaṁ …"},{"id":"mn1:48.1","pli":"nānattaṁ …"},{"id":"mn1:49.1","pli":"sabbaṁ …"},{"id":"mn1:50.1","pli":"nibbānaṁ nibbānato abhijānāti;"},{"id":"mn1:50.2","pli":"nibbānaṁ nibbānato abhiññāya nibbānaṁ mā maññi, nibbānasmiṁ mā maññi, nibbānato mā maññi, nibbānaṁ meti mā maññi, nibbānaṁ mābhinandi."},{"id":"mn1:50.3","pli":"Taṁ kissa hetu?"},{"id":"mn1:50.4","pli":"‘Pariññeyyaṁ tassā’ti vadāmi."},{"id":"mn1:50.5","pli":"Sekkhavasena dutiyanayabhūmiparicchedo niṭṭhito."},{"id":"mn1:51.1","pli":"Yopi so, bhikkhave, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, sopi pathaviṁ pathavito abhijānāti;","cite":{"sya":["12.7"],"msdiv":["8"]}},{"id":"mn1:51.2","pli":"pathaviṁ pathavito abhiññāya pathaviṁ na maññati, pathaviyā na maññati, pathavito na maññati, pathaviṁ meti na maññati, pathaviṁ nābhinandati."},{"id":"mn1:51.3","pli":"Taṁ kissa hetu?"},{"id":"mn1:51.4","pli":"‘Pariññātaṁ tassā’ti vadāmi."},{"id":"mn1:52.1","pli":"Āpaṁ …pe…"},{"id":"mn1:53.1","pli":"tejaṁ …"},{"id":"mn1:54.1","pli":"vāyaṁ …"},{"id":"mn1:55.1","pli":"bhūte …"},{"id":"mn1:56.1","pli":"deve …"},{"id":"mn1:57.1","pli":"pajāpatiṁ …"},{"id":"mn1:58.1","pli":"brahmaṁ …"},{"id":"mn1:59.1","pli":"ābhassare …"},{"id":"mn1:60.1","pli":"subhakiṇhe …"},{"id":"mn1:61.1","pli":"vehapphale …"},{"id":"mn1:62.1","pli":"abhibhuṁ …"},{"id":"mn1:63.1","pli":"ākāsānañcāyatanaṁ …"},{"id":"mn1:64.1","pli":"viññāṇañcāyatanaṁ …"},{"id":"mn1:65.1","pli":"ākiñcaññāyatanaṁ …"},{"id":"mn1:66.1","pli":"nevasaññānāsaññāyatanaṁ …"},{"id":"mn1:67.1","pli":"diṭṭhaṁ …"},{"id":"mn1:68.1","pli":"sutaṁ …"},{"id":"mn1:69.1","pli":"mutaṁ …"},{"id":"mn1:70.1","pli":"viññātaṁ …"},{"id":"mn1:71.1","pli":"ekattaṁ …"},{"id":"mn1:72.1","pli":"nānattaṁ …"},{"id":"mn1:73.1","pli":"sabbaṁ …"},{"id":"mn1:74.1","pli":"nibbānaṁ nibbānato abhijānāti;"},{"id":"mn1:74.2","pli":"nibbānaṁ nibbānato abhiññāya nibbānaṁ na maññati, nibbānasmiṁ na maññati, nibbānato na maññati, nibbānaṁ meti na maññati, nibbānaṁ nābhinandati."},{"id":"mn1:74.3","pli":"Taṁ kissa hetu?"},{"id":"mn1:74.4","pli":"‘Pariññātaṁ tassā’ti vadāmi."},{"id":"mn1:74.5","pli":"Khīṇāsavavasena tatiyanayabhūmiparicchedo niṭṭhito."},{"id":"mn1:75.1","pli":"Yopi so, bhikkhave, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññā vimutto, sopi pathaviṁ pathavito abhijānāti;","cite":{"pts-vp-pli":["1.5"],"msdiv":["9"]}},{"id":"mn1:75.2","pli":"pathaviṁ pathavito abhiññāya pathaviṁ na maññati, pathaviyā na maññati, pathavito na maññati, pathaviṁ meti na maññati, pathaviṁ nābhinandati."},{"id":"mn1:75.3","pli":"Taṁ kissa hetu?"},{"id":"mn1:75.4","pli":"Khayā rāgassa, vītarāgattā."},{"id":"mn1:76.1","pli":"Āpaṁ …pe…","cite":{"vri":["12.7"],"sya":["12.8"]}},{"id":"mn1:77.1","pli":"tejaṁ …"},{"id":"mn1:78.1","pli":"vāyaṁ …"},{"id":"mn1:79.1","pli":"bhūte …"},{"id":"mn1:80.1","pli":"deve …"},{"id":"mn1:81.1","pli":"pajāpatiṁ …"},{"id":"mn1:82.1","pli":"brahmaṁ …"},{"id":"mn1:83.1","pli":"ābhassare …"},{"id":"mn1:84.1","pli":"subhakiṇhe …"},{"id":"mn1:85.1","pli":"vehapphale …"},{"id":"mn1:86.1","pli":"abhibhuṁ …"},{"id":"mn1:87.1","pli":"ākāsānañcāyatanaṁ …"},{"id":"mn1:88.1","pli":"viññāṇañcāyatanaṁ …"},{"id":"mn1:89.1","pli":"ākiñcaññāyatanaṁ …"},{"id":"mn1:90.1","pli":"nevasaññānāsaññāyatanaṁ …"},{"id":"mn1:91.1","pli":"diṭṭhaṁ …"},{"id":"mn1:92.1","pli":"sutaṁ …"},{"id":"mn1:93.1","pli":"mutaṁ …"},{"id":"mn1:94.1","pli":"viññātaṁ …"},{"id":"mn1:95.1","pli":"ekattaṁ …"},{"id":"mn1:96.1","pli":"nānattaṁ …"},{"id":"mn1:97.1","pli":"sabbaṁ …"},{"id":"mn1:98.1","pli":"nibbānaṁ nibbānato abhijānāti;"},{"id":"mn1:98.2","pli":"nibbānaṁ nibbānato abhiññāya nibbānaṁ na maññati, nibbānasmiṁ na maññati, nibbānato na maññati, nibbānaṁ meti na maññati, nibbānaṁ nābhinandati."},{"id":"mn1:98.3","pli":"Taṁ kissa hetu?"},{"id":"mn1:98.4","pli":"Khayā rāgassa, vītarāgattā."},{"id":"mn1:98.5","pli":"Khīṇāsavavasena catutthanayabhūmiparicchedo niṭṭhito."},{"id":"mn1:99.1","pli":"Yopi so, bhikkhave, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, sopi pathaviṁ pathavito abhijānāti;","cite":{"msdiv":["10"]}},{"id":"mn1:99.2","pli":"pathaviṁ pathavito abhiññāya pathaviṁ na maññati, pathaviyā na maññati, pathavito na maññati, pathaviṁ meti na maññati, pathaviṁ nābhinandati."},{"id":"mn1:99.3","pli":"Taṁ kissa hetu?"},{"id":"mn1:99.4","pli":"Khayā dosassa, vītadosattā."},{"id":"mn1:100.1","pli":"Āpaṁ …pe…"},{"id":"mn1:101.1","pli":"tejaṁ …"},{"id":"mn1:102.1","pli":"vāyaṁ …"},{"id":"mn1:103.1","pli":"bhūte …"},{"id":"mn1:104.1","pli":"deve …"},{"id":"mn1:105.1","pli":"pajāpatiṁ …"},{"id":"mn1:106.1","pli":"brahmaṁ …"},{"id":"mn1:107.1","pli":"ābhassare …"},{"id":"mn1:108.1","pli":"subhakiṇhe …"},{"id":"mn1:109.1","pli":"vehapphale …"},{"id":"mn1:110.1","pli":"abhibhuṁ …"},{"id":"mn1:111.1","pli":"ākāsānañcāyatanaṁ …"},{"id":"mn1:112.1","pli":"viññāṇañcāyatanaṁ …"},{"id":"mn1:113.1","pli":"ākiñcaññāyatanaṁ …"},{"id":"mn1:114.1","pli":"nevasaññānāsaññāyatanaṁ …"},{"id":"mn1:115.1","pli":"diṭṭhaṁ …"},{"id":"mn1:116.1","pli":"sutaṁ …"},{"id":"mn1:117.1","pli":"mutaṁ …"},{"id":"mn1:118.1","pli":"viññātaṁ …"},{"id":"mn1:119.1","pli":"ekattaṁ …"},{"id":"mn1:120.1","pli":"nānattaṁ …"},{"id":"mn1:121.1","pli":"sabbaṁ …"},{"id":"mn1:122.1","pli":"nibbānaṁ nibbānato abhijānāti;"},{"id":"mn1:122.2","pli":"nibbānaṁ nibbānato abhiññāya nibbānaṁ na maññati, nibbānasmiṁ na maññati, nibbānato na maññati, nibbānaṁ meti na maññati, nibbānaṁ nābhinandati."},{"id":"mn1:122.3","pli":"Taṁ kissa hetu?"},{"id":"mn1:122.4","pli":"Khayā dosassa, vītadosattā."},{"id":"mn1:122.5","pli":"Khīṇāsavavasena pañcamanayabhūmiparicchedo niṭṭhito."},{"id":"mn1:123.1","pli":"Yopi so, bhikkhave, bhikkhu arahaṁ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto, sopi pathaviṁ pathavito abhijānāti;","cite":{"sya":["12.9"],"msdiv":["11"]}},{"id":"mn1:123.2","pli":"pathaviṁ pathavito abhiññāya pathaviṁ na maññati, pathaviyā na maññati, pathavito na maññati, pathaviṁ meti na maññati, pathaviṁ nābhinandati."},{"id":"mn1:123.3","pli":"Taṁ kissa hetu?"},{"id":"mn1:123.4","pli":"Khayā mohassa, vītamohattā."},{"id":"mn1:124.1","pli":"Āpaṁ …pe…","cite":{"vri":["12.8"]}},{"id":"mn1:125.1","pli":"tejaṁ …"},{"id":"mn1:126.1","pli":"vāyaṁ …"},{"id":"mn1:127.1","pli":"bhūte …"},{"id":"mn1:128.1","pli":"deve …"},{"id":"mn1:129.1","pli":"pajāpatiṁ …"},{"id":"mn1:130.1","pli":"brahmaṁ …"},{"id":"mn1:131.1","pli":"ābhassare …"},{"id":"mn1:132.1","pli":"subhakiṇhe …"},{"id":"mn1:133.1","pli":"vehapphale …"},{"id":"mn1:134.1","pli":"abhibhuṁ …"},{"id":"mn1:135.1","pli":"ākāsānañcāyatanaṁ …"},{"id":"mn1:136.1","pli":"viññāṇañcāyatanaṁ …"},{"id":"mn1:137.1","pli":"ākiñcaññāyatanaṁ …"},{"id":"mn1:138.1","pli":"nevasaññānāsaññāyatanaṁ …"},{"id":"mn1:139.1","pli":"diṭṭhaṁ …"},{"id":"mn1:140.1","pli":"sutaṁ …"},{"id":"mn1:141.1","pli":"mutaṁ …"},{"id":"mn1:142.1","pli":"viññātaṁ …"},{"id":"mn1:143.1","pli":"ekattaṁ …"},{"id":"mn1:144.1","pli":"nānattaṁ …"},{"id":"mn1:145.1","pli":"sabbaṁ …"},{"id":"mn1:146.1","pli":"nibbānaṁ nibbānato abhijānāti;"},{"id":"mn1:146.2","pli":"nibbānaṁ nibbānato abhiññāya nibbānaṁ na maññati, nibbānasmiṁ na maññati, nibbānato na maññati, nibbānaṁ meti na maññati, nibbānaṁ nābhinandati."},{"id":"mn1:146.3","pli":"Taṁ kissa hetu?"},{"id":"mn1:146.4","pli":"Khayā mohassa, vītamohattā."},{"id":"mn1:146.5","pli":"Khīṇāsavavasena chaṭṭhanayabhūmiparicchedo niṭṭhito."},{"id":"mn1:147.1","pli":"Tathāgatopi, bhikkhave, arahaṁ sammāsambuddho pathaviṁ pathavito abhijānāti;","cite":{"pts-vp-pli":["1.6"],"msdiv":["12"]}},{"id":"mn1:147.2","pli":"pathaviṁ pathavito abhiññāya pathaviṁ na maññati, pathaviyā na maññati, pathavito na maññati, pathaviṁ meti na maññati, pathaviṁ nābhinandati."},{"id":"mn1:147.3","pli":"Taṁ kissa hetu?"},{"id":"mn1:147.4","pli":"‘Pariññātantaṁ tathāgatassā’ti vadāmi."},{"id":"mn1:148.1","pli":"Āpaṁ …pe…","cite":{"sya":["12.10"]}},{"id":"mn1:149.1","pli":"tejaṁ …"},{"id":"mn1:150.1","pli":"vāyaṁ …"},{"id":"mn1:151.1","pli":"bhūte …"},{"id":"mn1:152.1","pli":"deve …"},{"id":"mn1:153.1","pli":"pajāpatiṁ …"},{"id":"mn1:154.1","pli":"brahmaṁ …"},{"id":"mn1:155.1","pli":"ābhassare …"},{"id":"mn1:156.1","pli":"subhakiṇhe …"},{"id":"mn1:157.1","pli":"vehapphale …"},{"id":"mn1:158.1","pli":"abhibhuṁ …"},{"id":"mn1:159.1","pli":"ākāsānañcāyatanaṁ …"},{"id":"mn1:160.1","pli":"viññāṇañcāyatanaṁ …"},{"id":"mn1:161.1","pli":"ākiñcaññāyatanaṁ …"},{"id":"mn1:162.1","pli":"nevasaññānāsaññāyatanaṁ …"},{"id":"mn1:163.1","pli":"diṭṭhaṁ …"},{"id":"mn1:164.1","pli":"sutaṁ …"},{"id":"mn1:165.1","pli":"mutaṁ …"},{"id":"mn1:166.1","pli":"viññātaṁ …"},{"id":"mn1:167.1","pli":"ekattaṁ …"},{"id":"mn1:168.1","pli":"nānattaṁ …"},{"id":"mn1:169.1","pli":"sabbaṁ …"},{"id":"mn1:170.1","pli":"nibbānaṁ nibbānato abhijānāti;"},{"id":"mn1:170.2","pli":"nibbānaṁ nibbānato abhiññāya nibbānaṁ na maññati, nibbānasmiṁ na maññati, nibbānato na maññati, nibbānaṁ meti na maññati, nibbānaṁ nābhinandati."},{"id":"mn1:170.3","pli":"Taṁ kissa hetu?"},{"id":"mn1:170.4","pli":"‘Pariññātantaṁ tathāgatassā’ti vadāmi."},{"id":"mn1:170.5","pli":"Tathāgatavasena sattamanayabhūmiparicchedo niṭṭhito."},{"id":"mn1:171.1","pli":"Tathāgatopi, bhikkhave, arahaṁ sammāsambuddho pathaviṁ pathavito abhijānāti;","cite":{"msdiv":["13"]}},{"id":"mn1:171.2","pli":"pathaviṁ pathavito abhiññāya pathaviṁ na maññati, pathaviyā na maññati, pathavito na maññati, pathaviṁ meti na maññati, pathaviṁ nābhinandati."},{"id":"mn1:171.3","pli":"Taṁ kissa hetu?"},{"id":"mn1:171.4","pli":"‘Nandī dukkhassa mūlan’ti—"},{"id":"mn1:171.5","pli":"iti viditvā ‘bhavā jāti bhūtassa jarāmaraṇan’ti."},{"id":"mn1:171.6","pli":"Tasmātiha, bhikkhave, ‘tathāgato sabbaso taṇhānaṁ khayā virāgā nirodhā cāgā paṭinissaggā anuttaraṁ sammāsambodhiṁ abhisambuddho’ti vadāmi."},{"id":"mn1:172.1","pli":"Āpaṁ …pe…","cite":{"vri":["12.9"],"sya":["12.11"]}},{"id":"mn1:173.1","pli":"tejaṁ …"},{"id":"mn1:174.1","pli":"vāyaṁ …"},{"id":"mn1:175.1","pli":"bhūte …"},{"id":"mn1:176.1","pli":"deve …"},{"id":"mn1:177.1","pli":"pajāpatiṁ …"},{"id":"mn1:178.1","pli":"brahmaṁ …"},{"id":"mn1:179.1","pli":"ābhassare …"},{"id":"mn1:180.1","pli":"subhakiṇhe …"},{"id":"mn1:181.1","pli":"vehapphale …"},{"id":"mn1:182.1","pli":"abhibhuṁ …"},{"id":"mn1:183.1","pli":"ākāsānañcāyatanaṁ …"},{"id":"mn1:184.1","pli":"viññāṇañcāyatanaṁ …"},{"id":"mn1:185.1","pli":"ākiñcaññāyatanaṁ …"},{"id":"mn1:186.1","pli":"nevasaññānāsaññāyatanaṁ …"},{"id":"mn1:187.1","pli":"diṭṭhaṁ …"},{"id":"mn1:188.1","pli":"sutaṁ …"},{"id":"mn1:189.1","pli":"mutaṁ …"},{"id":"mn1:190.1","pli":"viññātaṁ …"},{"id":"mn1:191.1","pli":"ekattaṁ …"},{"id":"mn1:192.1","pli":"nānattaṁ …"},{"id":"mn1:193.1","pli":"sabbaṁ …"},{"id":"mn1:194.1","pli":"nibbānaṁ nibbānato abhijānāti;"},{"id":"mn1:194.2","pli":"nibbānaṁ nibbānato abhiññāya nibbānaṁ na maññati, nibbānasmiṁ na maññati, nibbānato na maññati, nibbānaṁ meti na maññati, nibbānaṁ nābhinandati."},{"id":"mn1:194.3","pli":"Taṁ kissa hetu?"},{"id":"mn1:194.4","pli":"‘Nandī dukkhassa mūlan’ti—"},{"id":"mn1:194.5","pli":"iti viditvā ‘bhavā jāti bhūtassa jarāmaraṇan’ti."},{"id":"mn1:194.6","pli":"Tasmātiha, bhikkhave, ‘tathāgato sabbaso taṇhānaṁ khayā virāgā nirodhā cāgā paṭinissaggā anuttaraṁ sammāsambodhiṁ abhisambuddho’ti vadāmī”ti."},{"id":"mn1:194.7","pli":"Tathāgatavasena aṭṭhamanayabhūmiparicchedo niṭṭhito."},{"id":"mn1:194.8","pli":"Idamavoca bhagavā."},{"id":"mn1:194.9","pli":"Na te bhikkhū bhagavato bhāsitaṁ abhinandunti."},{"id":"mn1:194.10","pli":"Mūlapariyāyasuttaṁ niṭṭhitaṁ paṭhamaṁ."}]}