Aṅguttara Nikāya 3.120 12. Āpāyikavagga
id: an3.120 สยามรัฐ: vol 20 17 segments
Aṅguttara Nikāya 3.120 12. Āpāyikavagga Paṭhamasoceyyasutta
“Tīṇimāni, bhikkhave, soceyyāni. sya:20.350 Katamāni tīṇi? Kāyasoceyyaṁ, vacīsoceyyaṁ, manosoceyyaṁ. Katamañca, bhikkhave, kāyasoceyyaṁ? Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti. Idaṁ vuccati, bhikkhave, kāyasoceyyaṁ.
Katamañca, bhikkhave, vacīsoceyyaṁ? Idha, bhikkhave, ekacco musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti. Idaṁ vuccati, bhikkhave, vacīsoceyyaṁ.
Katamañca, bhikkhave, manosoceyyaṁ? Idha, bhikkhave, ekacco anabhijjhālu hoti abyāpannacitto sammādiṭṭhiko. Idaṁ vuccati, bhikkhave, manosoceyyaṁ. Imāni kho, bhikkhave, tīṇi soceyyānī”ti. Aṭṭhamaṁ.