Aṅguttara Nikāya 3.18 2. Rathakāravagga
id: an3.18 สยามรัฐ: vol 20 10 segments
Aṅguttara Nikāya 3.18 2. Rathakāravagga Devalokasutta
“Sace vo, bhikkhave, aññatitthiyā paribbājakā evaṁ puccheyyuṁ: sya:20.145 ‘devalokūpapattiyā, āvuso, samaṇe gotame brahmacariyaṁ vussathā’ti? Nanu tumhe, bhikkhave, evaṁ puṭṭhā aṭṭīyeyyātha harāyeyyātha jiguccheyyāthā”ti? “Evaṁ, bhante”. “Iti kira tumhe, bhikkhave, dibbena āyunā aṭṭīyatha harāyatha jigucchatha, dibbena vaṇṇena dibbena sukhena dibbena yasena dibbenādhipateyyena aṭṭīyatha harāyatha jigucchatha; pageva kho pana, bhikkhave, tumhehi kāyaduccaritena aṭṭīyitabbaṁ harāyitabbaṁ jigucchitabbaṁ, vacīduccaritena … manoduccaritena aṭṭīyitabbaṁ harāyitabbaṁ jigucchitabban”ti. Aṭṭhamaṁ.