Aṅguttara Nikāya 5.160 16. Saddhammavagga
id: an5.160 14 segments
Aṅguttara Nikāya 5.160 16. Saddhammavagga Duppaṭivinodayasutta
“Pañcime, bhikkhave, uppannā duppaṭivinodayā. Katame pañca? Uppanno rāgo duppaṭivinodayo, uppanno doso duppaṭivinodayo, uppanno moho duppaṭivinodayo, uppannaṁ paṭibhānaṁ duppaṭivinodayaṁ, uppannaṁ gamikacittaṁ duppaṭivinodayaṁ. Ime kho, bhikkhave, pañca uppannā duppaṭivinodayā”ti. Dasamaṁ. Saddhammavaggo paṭhamo.
Tassuddānaṁ Tayo sammattaniyāmā, tayo saddhammasammosā; Dukkathā ceva sārajjaṁ, udāyidubbinodayāti.