Aṅguttara Nikāya 6.105 10. Ānisaṁsavagga
id: an6.105 VRI: vol 38 13 segments
Aṅguttara Nikāya 6.105 10. Ānisaṁsavagga Bhavasutta
“Tayome, bhikkhave, bhavā pahātabbā, tīsu sikkhāsu sikkhitabbaṁ. vri:38.144 Katame tayo bhavā pahātabbā? Kāmabhavo, rūpabhavo, arūpabhavo— ime tayo bhavā pahātabbā. Katamāsu tīsu sikkhāsu sikkhitabbaṁ? Adhisīlasikkhāya, adhicittasikkhāya, adhipaññāsikkhāya— imāsu tīsu sikkhāsu sikkhitabbaṁ. Yato kho, bhikkhave, bhikkhuno ime tayo bhavā pahīnā honti, imāsu ca tīsu sikkhāsu sikkhitasikkho hoti— ayaṁ vuccati, bhikkhave, bhikkhu acchecchi taṇhaṁ, vivattayi saṁyojanaṁ, sammā mānābhisamayā antamakāsi dukkhassā”ti. Dasamaṁ.