Aṅguttara Nikāya 7.5 1. Dhanavagga

id: an7.5 VRI: vol 38 20 segments

Aṅguttara Nikāya 7.5 1. Dhanavagga Saṅkhittadhanasutta

“Sattimāni, bhikkhave, dhanāni. Katamāni satta? Saddhādhanaṁ, sīladhanaṁ, hirīdhanaṁ, ottappadhanaṁ, sutadhanaṁ, cāgadhanaṁ, paññādhanaṁ. Imāni kho, bhikkhave, satta dhanānīti.

Saddhādhanaṁ sīladhanaṁ, vri:38.157 hirī ottappiyaṁ dhanaṁ; Sutadhanañca cāgo ca, paññā ve sattamaṁ dhanaṁ.

Yassa ete dhanā atthi, itthiyā purisassa vā; Adaliddoti taṁ āhu, amoghaṁ tassa jīvitaṁ.

Tasmā saddhañca sīlañca, Pasādaṁ dhammadassanaṁ; Anuyuñjetha medhāvī, Saraṁ buddhāna sāsanan”ti. Pañcamaṁ.