Kathāvatthu Mahāpaṇṇāsaka
id: kv11.3 VRI: vol 116 สยามรัฐ: vol 37 56 segments
Kathāvatthu Mahāpaṇṇāsaka Ekādasamavagga Ñāṇaṁcittavippayuttantikathā
Ñāṇaṁ cittavippayuttanti? sya:37.481 Āmantā. Rūpaṁ nibbānaṁ cakkhāyatanaṁ …pe… phoṭṭhabbāyatananti? Na hevaṁ vattabbe …pe… ñāṇaṁ cittavippayuttanti? Āmantā. Paññā paññindriyaṁ paññābalaṁ sammādiṭṭhi dhammavicayasambojjhaṅgo cittavippayuttoti? Na hevaṁ vattabbe …pe… paññā paññindriyaṁ paññābalaṁ sammādiṭṭhi dhammavicayasambojjhaṅgo cittasampayuttoti? Āmantā. Ñāṇaṁ cittasampayuttanti? Na hevaṁ vattabbe …pe….
Ñāṇaṁ cittavippayuttanti? sya:37.482 Āmantā. Katamakkhandhapariyāpannanti? Saṅkhārakkhandhapariyāpannanti. Saṅkhārakkhandho cittavippayuttoti? Na hevaṁ vattabbe …pe… saṅkhārakkhandho cittavippayuttoti? Āmantā. Vedanākkhandho saññākkhandho cittavippayuttoti? Na hevaṁ vattabbe …pe… ñāṇaṁ saṅkhārakkhandhapariyāpannaṁ cittavippayuttanti? Āmantā. Paññā saṅkhārakkhandhapariyāpannā cittavippayuttāti? Na hevaṁ vattabbe …pe… paññā saṅkhārakkhandhapariyāpannā cittasampayuttāti? Āmantā. Ñāṇaṁ saṅkhārakkhandhapariyāpannaṁ cittasampayuttanti? Na hevaṁ vattabbe …pe… ñāṇaṁ saṅkhārakkhandhapariyāpannaṁ cittavippayuttaṁ, paññā saṅkhārakkhandhapariyāpannā cittasampayuttāti? Āmantā. Saṅkhārakkhandho ekadeso cittasampayutto ekadeso cittavippayuttoti? Na hevaṁ vattabbe …pe… saṅkhārakkhandho ekadeso cittasampayutto ekadeso cittavippayuttoti? Āmantā. Vedanākkhandho saññākkhandho ekadeso cittasampayutto ekadeso cittavippayuttoti? Na hevaṁ vattabbe …pe….
Na vattabbaṁ— vri:116.366 “ñāṇaṁ cittavippayuttan”ti? Āmantā. Arahā cakkhuviññāṇasamaṅgī “ñāṇī”ti vattabboti? Āmantā. Ñāṇaṁ tena cittena sampayuttanti? Na hevaṁ vattabbe. Tena hi ñāṇaṁ cittavippayuttanti.
Arahā cakkhuviññāṇasamaṅgī “paññavā”ti vattabboti? Āmantā. Paññā tena cittena sampayuttāti? Na hevaṁ vattabbe. Tena hi paññā cittavippayuttāti. Ñāṇaṁ cittavippayuttantikathā niṭṭhitā.