Kathāvatthu Mahāpaṇṇāsaka
id: kv14.2 VRI: vol 116 สยามรัฐ: vol 37 50 segments
Kathāvatthu Mahāpaṇṇāsaka Cuddasamavagga Saḷāyatanuppattikathā
Saḷāyatanaṁ apubbaṁ acarimaṁ mātukucchismiṁ saṇṭhātīti? Āmantā. Sabbaṅgapaccaṅgī ahīnindriyo mātukucchismiṁ okkamatīti? Na hevaṁ vattabbe …pe….
Upapattesiyena cittena cakkhāyatanaṁ saṇṭhātīti? Āmantā. Upapattesiyena cittena hatthā saṇṭhanti, pādā saṇṭhanti, sīsaṁ saṇṭhāti, kaṇṇo saṇṭhāti, nāsikā saṇṭhāti, mukhaṁ saṇṭhāti, dantā saṇṭhantīti? Na hevaṁ vattabbe …pe….
Upapattesiyena cittena sotāyatanaṁ …pe… sya:37.524 ghānāyatanaṁ …pe… jivhāyatanaṁ saṇṭhātīti? Āmantā. Upapattesiyena cittena hatthā saṇṭhanti, pādā saṇṭhanti, sīsaṁ saṇṭhāti, kaṇṇo saṇṭhāti, nāsikā saṇṭhāti, mukhaṁ saṇṭhāti, dantā saṇṭhantīti? Na hevaṁ vattabbe …pe….
Mātukucchigatassa pacchā cakkhāyatanaṁ uppajjatīti? Āmantā. Mātukucchismiṁ cakkhupaṭilābhāya kammaṁ karotīti? Na hevaṁ vattabbe …pe… mātukucchigatassa pacchā sotāyatanaṁ …pe… ghānāyatanaṁ …pe… jivhāyatanaṁ uppajjatīti? Āmantā. Mātukucchismiṁ jivhāpaṭilābhāya kammaṁ karotīti? Na hevaṁ vattabbe …pe….
Mātukucchigatassa pacchā kesā lomā nakhā dantā aṭṭhī uppajjantīti? vri:116.399 Āmantā. Mātukucchismiṁ aṭṭhipaṭilābhāya kammaṁ karotīti? Na hevaṁ vattabbe …pe….
Na vattabbaṁ— “mātukucchigatassa pacchā kesā lomā nakhā dantā aṭṭhī uppajjantī”ti? Āmantā. Nanu vuttaṁ bhagavatā—
“Paṭhamaṁ kalalaṁ hoti, kalalā hoti abbudaṁ; Abbudā jāyate pesi, pesi nibbattate ghano; Ghanā pasākhā jāyanti, kesā lomā nakhāpi ca.
Yañcassa bhuñjati mātā, annaṁ pānañca bhojanaṁ; Tena so tattha yāpeti, mātukucchigato naro”ti.
Attheva suttantoti? sya:37.525 Āmantā. Tena hi mātukucchigatassa pacchā kesā lomā nakhā dantā aṭṭhī uppajjantīti. Saḷāyatanuppattikathā niṭṭhitā.