Kathāvatthu Mahāpaṇṇāsaka
id: kv5.5 VRI: vol 116 สยามรัฐ: vol 37 52 segments
Kathāvatthu Mahāpaṇṇāsaka Pañcamavagga Paṭisambhidākathā
Sabbaṁ ñāṇaṁ paṭisambhidāti? sya:37.337 Āmantā. Sammutiñāṇaṁ paṭisambhidāti? Na hevaṁ vattabbe …pe… sammutiñāṇaṁ paṭisambhidāti? Āmantā. Ye keci sammutiṁ jānanti, sabbe te paṭisambhidāpattāti? Na hevaṁ vattabbe …pe… sabbaṁ ñāṇaṁ paṭisambhidāti? Āmantā. Cetopariyāye ñāṇaṁ paṭisambhidāti? Na hevaṁ vattabbe …pe… cetopariyāye ñāṇaṁ paṭisambhidāti? Āmantā. Ye keci paracittaṁ jānanti, sabbe te paṭisambhidāpattāti? Na hevaṁ vattabbe …pe….
Sabbaṁ ñāṇaṁ paṭisambhidāti? vri:116.260 Āmantā. Sabbā paññā paṭisambhidāti? Na hevaṁ vattabbe …pe… sabbā paññā paṭisambhidāti? Āmantā. Pathavīkasiṇaṁ samāpattiṁ samāpannassa atthi paññā, sā paññā paṭisambhidāti? Na hevaṁ vattabbe …pe… āpokasiṇaṁ …pe… tejokasiṇaṁ …pe… vāyokasiṇaṁ …pe… nīlakasiṇaṁ …pe… pītakasiṇaṁ …pe… lohitakasiṇaṁ …pe… odātakasiṇaṁ …pe… ākāsānañcāyatanaṁ …pe… viññāṇañcāyatanaṁ …pe… ākiñcaññāyatanaṁ …pe… nevasaññānāsaññāyatanaṁ samāpannassa …pe… dānaṁ dadantassa …pe… cīvaraṁ dadantassa …pe… piṇḍapātaṁ dadantassa …pe… senāsanaṁ dadantassa …pe… gilānapaccayabhesajjaparikkhāraṁ dadantassa atthi paññā, sā paññā paṭisambhidāti? Na hevaṁ vattabbe …pe….
Na vattabbaṁ— sya:37.338 “sabbaṁ ñāṇaṁ paṭisambhidā”ti? Āmantā. Atthi lokuttarā paññā, sā paññā na paṭisambhidāti? Na hevaṁ vattabbe …pe… tena hi sabbaṁ ñāṇaṁ paṭisambhidāti. Paṭisambhidākathā niṭṭhitā.