Milindapañha Opammakathāpañha
id: mil7.3.1 VRI: vol 81 18 segments
Milindapañha Opammakathāpañha Samuddavagga 1. Lābulataṅgapañha
“Bhante nāgasena, ‘lābulatāya ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti? vri:81.341 “Yathā, mahārāja, lābulatā tiṇe vā kaṭṭhe vā latāya vā soṇḍikāhi ālambitvā tassūpari vaḍḍhati; evameva kho, mahārāja, yoginā yogāvacarena arahatte abhivaḍḍhitukāmena manasā ārammaṇaṁ ālambitvā arahatte abhivaḍḍhitabbaṁ. Idaṁ, mahārāja, lābulatāya ekaṁ aṅgaṁ gahetabbaṁ. Bhāsitampetaṁ, mahārāja, therena sāriputtena dhammasenāpatinā—
‘Yathā lābulatā nāma, tiṇe kaṭṭhe latāya vā; Ālambitvā soṇḍikāhi, tato vaḍḍhati uppari.
Tatheva buddhaputtena, Arahattaphalakāminā; Ārammaṇaṁ ālambitvā, Vaḍḍhitabbaṁ asekkhaphale’”ti.
Lābulataṅgapañho paṭhamo.