← _

Theravāda Vinaya Mahāvibhaṅga

id: pli-tv-bu-vb-ss1 VRI: vol 87 สยามรัฐ: vol 1 758 segments
Theravāda Vinaya Mahāvibhaṅga Saṅghādisesakaṇḍa 1. Sukkavissaṭṭhisikkhāpada Ime kho panāyasmanto terasa saṅghādisesā dhammā uddesaṁ āgacchanti.
Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena āyasmā seyyasako anabhirato brahmacariyaṁ carati. So tena kiso hoti lūkho dubbaṇṇo uppaṇḍuppaṇḍukajāto dhamanisanthatagatto. Addasa kho āyasmā udāyī āyasmantaṁ seyyasakaṁ kisaṁ lūkhaṁ dubbaṇṇaṁ uppaṇḍuppaṇḍukajātaṁ dhamanisanthatagattaṁ. Disvāna āyasmantaṁ seyyasakaṁ etadavoca— “kissa tvaṁ, āvuso seyyasaka, kiso lūkho dubbaṇṇo uppaṇḍuppaṇḍukajāto dhamanisanthatagatto? Kacci no tvaṁ, āvuso seyyasaka, anabhirato brahmacariyaṁ carasī”ti? “Evamāvuso”ti. “Tena hi tvaṁ, āvuso seyyasaka, yāvadatthaṁ bhuñja yāvadatthaṁ supa yāvadatthaṁ nhāya. Yāvadatthaṁ bhuñjitvā yāvadatthaṁ supitvā yāvadatthaṁ nhāyitvā yadā te anabhirati uppajjati rāgo cittaṁ anuddhaṁseti tadā hatthena upakkamitvā asuciṁ mocehī”ti. “Kiṁ nu kho, āvuso, kappati evarūpaṁ kātun”ti? “Āma, āvuso. Ahampi evaṁ karomī”ti. Atha kho āyasmā seyyasako yāvadatthaṁ bhuñji yāvadatthaṁ supi yāvadatthaṁ nhāyi. Yāvadatthaṁ bhuñjitvā yāvadatthaṁ supitvā yāvadatthaṁ nhāyitvā yadā anabhirati uppajjati rāgo cittaṁ anuddhaṁseti tadā hatthena upakkamitvā asuciṁ mocesi. Atha kho āyasmā seyyasako aparena samayena vaṇṇavā ahosi pīṇindriyo pasannamukhavaṇṇo vippasannachavivaṇṇo. Atha kho āyasmato seyyasakassa sahāyakā bhikkhū āyasmantaṁ seyyasakaṁ etadavocuṁ— “pubbe kho tvaṁ, āvuso seyyasaka, kiso ahosi lūkho dubbaṇṇo uppaṇḍuppaṇḍukajāto dhamanisanthatagatto. So dāni tvaṁ etarahi vaṇṇavā pīṇindriyo pasannamukhavaṇṇo vippasannachavivaṇṇo. Kiṁ nu kho tvaṁ, āvuso seyyasaka, bhesajjaṁ karosī”ti? “Na kho ahaṁ, āvuso, bhesajjaṁ karomi. Api cāhaṁ yāvadatthaṁ bhuñjāmi yāvadatthaṁ supāmi yāvadatthaṁ nhāyāmi. Yāvadatthaṁ bhuñjitvā yāvadatthaṁ supitvā yāvadatthaṁ nhāyitvā yadā me anabhirati uppajjati rāgo cittaṁ anuddhaṁseti tadā hatthena upakkamitvā asuciṁ mocemī”ti. “Kiṁ pana tvaṁ, āvuso seyyasaka, yeneva hatthena saddhādeyyaṁ bhuñjasi teneva hatthena upakkamitvā asuciṁ mocesī”ti? “Evamāvuso”ti. Ye te bhikkhū appicchā …pe… te ujjhāyanti khiyyanti vipācenti— “kathañhi nāma āyasmā seyyasako hatthena upakkamitvā asuciṁ mocessatī”ti. Atha kho te bhikkhū āyasmantaṁ seyyasakaṁ anekapariyāyena vigarahitvā bhagavato etamatthaṁ ārocesuṁ. Atha kho bhagavā etasmiṁ nidāne etasmiṁ pakaraṇe bhikkhusaṅghaṁ sannipātāpetvā āyasmantaṁ seyyasakaṁ paṭipucchi— “saccaṁ kira tvaṁ, seyyasaka, hatthena upakkamitvā asuciṁ mocesī”ti? “Saccaṁ, bhagavā”ti. Vigarahi buddho bhagavā— “ananucchavikaṁ, moghapurisa, ananulomikaṁ appatirūpaṁ assāmaṇakaṁ akappiyaṁ akaraṇīyaṁ. Kathañhi nāma tvaṁ, moghapurisa, hatthena upakkamitvā asuciṁ mocessasi. Nanu mayā, moghapurisa, anekapariyāyena virāgāya dhammo desito no sarāgāya, visaññogāya dhammo desito no saññogāya, anupādānāya dhammo desito no saupādānāya. Tattha nāma tvaṁ, moghapurisa, mayā virāgāya dhamme desite sarāgāya cetessasi, visaññogāya dhamme desite saññogāya cetessasi, anupādānāya dhamme desite saupādānāya cetessasi. Nanu mayā, moghapurisa, anekapariyāyena rāgavirāgāya dhammo desito, madanimmadanāya pipāsavinayāya ālayasamugghātāya vaṭṭupacchedāya taṇhākkhayāya virāgāya nirodhāya nibbānāya dhammo desito? Nanu mayā, moghapurisa, anekapariyāyena kāmānaṁ pahānaṁ akkhātaṁ, kāmasaññānaṁ pariññā akkhātā, kāmapipāsānaṁ paṭivinayo akkhāto, kāmavitakkānaṁ samugghāto akkhāto, kāmapariḷāhānaṁ vūpasamo akkhāto? Netaṁ, moghapurisa, appasannānaṁ vā pasādāya, pasannānaṁ vā bhiyyobhāvāya. Atha khvetaṁ, moghapurisa, appasannānañceva appasādāya, pasannānañca ekaccānaṁ aññathattāyā”ti. Atha kho bhagavā āyasmantaṁ seyyasakaṁ anekapariyāyena vigarahitvā dubbharatāya …pe… evañca pana, bhikkhave, imaṁ sikkhāpadaṁ uddiseyyātha— “Sañcetanikā sukkavissaṭṭhi saṅghādiseso”ti. Evañcidaṁ bhagavatā bhikkhūnaṁ sikkhāpadaṁ paññattaṁ hoti.
Tena kho pana samayena bhikkhū paṇītabhojanāni bhuñjitvā muṭṭhassatī asampajānā niddaṁ okkamanti. Tesaṁ muṭṭhassatīnaṁ asampajānānaṁ niddaṁ okkamantānaṁ supinantena asuci muccati. Tesaṁ kukkuccaṁ ahosi— “bhagavatā sikkhāpadaṁ paññattaṁ— ‘sañcetanikā sukkavissaṭṭhi saṅghādiseso’ti. Amhākañca supinantena asuci muccati. Atthi cettha cetanā labbhati. Kacci nu kho mayaṁ saṅghādisesaṁ āpattiṁ āpannā”ti? Bhagavato etamatthaṁ ārocesuṁ. “Atthesā, bhikkhave, cetanā; sā ca kho abbohārikāti. Evañca pana, bhikkhave, imaṁ sikkhāpadaṁ uddiseyyātha— “Sañcetanikā sukkavissaṭṭhi aññatra supinantā saṅghādiseso”ti. Sañcetanikāti jānanto sañjānanto cecca abhivitaritvā vītikkamo. Sukkanti dasa sukkāni— nīlaṁ pītakaṁ lohitakaṁ odātaṁ takkavaṇṇaṁ dakavaṇṇaṁ telavaṇṇaṁ khīravaṇṇaṁ dadhivaṇṇaṁ sappivaṇṇaṁ. Vissaṭṭhīti ṭhānato cāvanā vuccati vissaṭṭhīti. Aññatra supinantāti ṭhapetvā supinantaṁ. Saṅghādisesoti saṅghova tassā āpattiyā parivāsaṁ deti, mūlāya paṭikassati, mānattaṁ deti, abbheti; na sambahulā, na ekapuggalo. Tena vuccati—“saṅghādiseso”ti. Tasseva āpattinikāyassa nāmakammaṁ adhivacanaṁ. Tenapi vuccati—“saṅghādiseso”ti.
Ajjhattarūpe moceti, bahiddhārūpe moceti, ajjhattabahiddhārūpe moceti, ākāse kaṭiṁ kampento moceti; rāgūpatthambhe moceti, vaccūpatthambhe moceti, passāvūpatthambhe moceti, vātūpatthambhe moceti, uccāliṅgapāṇakadaṭṭhūpatthambhe moceti; ārogyatthāya moceti, sukhatthāya moceti, bhesajjatthāya moceti, dānatthāya moceti, puññatthāya moceti, yaññatthāya moceti, saggatthāya moceti, bījatthāya moceti, vīmaṁsatthāya moceti, davatthāya moceti; nīlaṁ moceti, pītakaṁ moceti, lohitakaṁ moceti, odātaṁ moceti, takkavaṇṇaṁ moceti, dakavaṇṇaṁ moceti, telavaṇṇaṁ moceti, khīravaṇṇaṁ moceti, dadhivaṇṇaṁ moceti, sappivaṇṇaṁ moceti. Ajjhattarūpeti ajjhattaṁ upādinne rūpe. Bahiddhārūpeti bahiddhā upādinne vā anupādinne vā. Ajjhattabahiddhārūpeti tadubhaye. Ākāse kaṭiṁ kampentoti ākāse vāyamantassa aṅgajātaṁ kammaniyaṁ hoti. Rāgūpatthambheti rāgena pīḷitassa aṅgajātaṁ kammaniyaṁ hoti. Vaccūpatthambheti vaccena pīḷitassa aṅgajātaṁ kammaniyaṁ hoti. Passāvūpatthambheti passāvena pīḷitassa aṅgajātaṁ kammaniyaṁ hoti. Vātūpatthambheti vātena pīḷitassa aṅgajātaṁ kammaniyaṁ hoti. Uccāliṅgapāṇakadaṭṭhūpatthambheti uccāliṅgapāṇakadaṭṭhena aṅgajātaṁ kammaniyaṁ hoti. Ārogyatthāyāti arogo bhavissāmi. Sukhatthāyāti sukhaṁ vedanaṁ uppādessāmi. Bhesajjatthāyāti bhesajjaṁ bhavissati. Dānatthāyāti dānaṁ dassāmi. Puññatthāyāti puññaṁ bhavissati. Yaññatthāyāti yaññaṁ yajissāmi. Saggatthāyāti saggaṁ gamissāmi. Bījatthāyāti bījaṁ bhavissati. Vīmaṁsatthāyāti nīlaṁ bhavissati, pītakaṁ bhavissati, lohitakaṁ bhavissati, odātaṁ bhavissati, takkavaṇṇaṁ bhavissati, dakavaṇṇaṁ bhavissati, telavaṇṇaṁ bhavissati, khīravaṇṇaṁ bhavissati, dadhivaṇṇaṁ bhavissati, sappivaṇṇaṁ bhavissatīti. Davatthāyāti khiḍḍādhippāyo. Ajjhattarūpe ceteti upakkamati muccati, āpatti saṅghādisesassa. Bahiddhārūpe ceteti upakkamati muccati, āpatti saṅghādisesassa. Ajjhattabahiddhārūpe ceteti upakkamati muccati, āpatti saṅghādisesassa. Ākāse kaṭiṁ kampento ceteti upakkamati muccati, āpatti saṅghādisesassa. Rāgūpatthambhe ceteti upakkamati muccati, āpatti saṅghādisesassa. Vaccūpatthambhe ceteti upakkamati muccati, āpatti saṅghādisesassa. Passāvūpatthambhe ceteti upakkamati muccati, āpatti saṅghādisesassa. Vātūpatthambhe ceteti upakkamati muccati, āpatti saṅghādisesassa. Uccāliṅgapāṇakadaṭṭhūpatthambhe ceteti upakkamati muccati, āpatti saṅghādisesassa. Ārogyatthāya ceteti upakkamati muccati, āpatti saṅghādisesassa. Sukhatthāya …pe… bhesajjatthāya … dānatthāya … puññatthāya … yaññatthāya … saggatthāya … bījatthāya … vīmaṁsatthāya … davatthāya ceteti upakkamati muccati, āpatti saṅghādisesassa. Nīlaṁ ceteti upakkamati muccati, āpatti saṅghādisesassa. Pītakaṁ … lohitakaṁ … odātaṁ … takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ … sappivaṇṇaṁ ceteti upakkamati muccati, āpatti saṅghādisesassa. Suddhikaṁ niṭṭhitaṁ. Ārogyatthañca sukhatthañca ceteti upakkamati muccati, āpatti saṅghādisesassa. Ārogyatthañca bhesajjatthañca …pe… ārogyatthañca dānatthañca … ārogyatthañca puññatthañca … ārogyatthañca yaññatthañca … ārogyatthañca saggatthañca … ārogyatthañca bījatthañca … ārogyatthañca vīmaṁsatthañca … ārogyatthañca davatthañca ceteti upakkamati muccati, āpatti saṅghādisesassa. Ekamūlakassa khaṇḍacakkaṁ niṭṭhitaṁ. Sukhatthañca bhesajjatthañca ceteti upakkamati muccati, āpatti saṅghādisesassa. Sukhatthañca dānatthañca …pe… sukhatthañca puññatthañca … sukhatthañca yaññatthañca … sukhatthañca saggatthañca … sukhatthañca bījatthañca … sukhatthañca vīmaṁsatthañca … sukhatthañca davatthañca ceteti upakkamati muccati, āpatti saṅghādisesassa. Sukhatthañca ārogyatthañca ceteti upakkamati muccati, āpatti saṅghādisesassa. Bhesajjatthañca dānatthañca …pe… bhesajjatthañca puññatthañca … bhesajjatthañca yaññatthañca … bhesajjatthañca saggatthañca … bhesajjatthañca bījatthañca … bhesajjatthañca vīmaṁsatthañca … bhesajjatthañca davatthañca ceteti upakkamati muccati, āpatti saṅghādisesassa. Bhesajjatthañca ārogyatthañca …pe… bhesajjatthañca sukhatthañca ceteti upakkamati muccati, āpatti saṅghādisesassa. Dānatthañca puññatthañca …pe… dānatthañca yaññatthañca … dānatthañca saggatthañca … dānatthañca bījatthañca … dānatthañca vīmaṁsatthañca … dānatthañca davatthañca ceteti upakkamati muccati, āpatti saṅghādisesassa. Dānatthañca ārogyatthañca …pe… dānatthañca sukhatthañca … dānatthañca bhesajjatthañca ceteti upakkamati muccati, āpatti saṅghādisesassa. Puññatthañca yaññatthañca …pe… puññatthañca saggatthañca … puññatthañca bījatthañca … puññatthañca vīmaṁsatthañca … puññatthañca davatthañca ceteti upakkamati muccati, āpatti saṅghādisesassa. Puññatthañca ārogyatthañca …pe… puññatthañca sukhatthañca … puññatthañca bhesajjatthañca … puññatthañca dānatthañca ceteti upakkamati muccati, āpatti saṅghādisesassa. Yaññatthañca saggatthañca …pe… yaññatthañca bījatthañca … yaññatthañca vīmaṁsatthañca … yaññatthañca davatthañca ceteti upakkamati muccati, āpatti saṅghādisesassa. Yaññatthañca ārogyatthañca …pe… yaññatthañca sukhatthañca … yaññatthañca bhesajjatthañca … yaññatthañca dānatthañca … yaññatthañca puññatthañca ceteti upakkamati muccati, āpatti saṅghādisesassa. Saggatthañca bījatthañca …pe… saggatthañca vīmaṁsatthañca … saggatthañca davatthañca ceteti upakkamati muccati, āpatti saṅghādisesassa. Saggatthañca ārogyatthañca …pe… saggatthañca sukhatthañca … saggatthañca bhesajjatthañca … saggatthañca dānatthañca … saggatthañca puññatthañca … saggatthañca yaññatthañca ceteti upakkamati muccati, āpatti saṅghādisesassa. Bījatthañca vīmaṁsatthañca …pe… bījatthañca davatthañca ceteti upakkamati muccati, āpatti saṅghādisesassa. Bījatthañca ārogyatthañca …pe… bījatthañca sukhatthañca … bījatthañca bhesajjatthañca … bījatthañca dānatthañca … bījatthañca puññatthañca … bījatthañca yaññatthañca … bījatthañca saggatthañca ceteti upakkamati muccati, āpatti saṅghādisesassa. Vīmaṁsatthañca davatthañca ceteti upakkamati muccati, āpatti saṅghādisesassa. Vīmaṁsatthañca ārogyatthañca …pe… vīmaṁsatthañca sukhatthañca … vīmaṁsatthañca bhesajjatthañca … vīmaṁsatthañca dānatthañca … vīmaṁsatthañca puññatthañca … vīmaṁsatthañca yaññatthañca … vīmaṁsatthañca saggatthañca … vīmaṁsatthañca bījatthañca ceteti upakkamati muccati, āpatti saṅghādisesassa. Davatthañca ārogyatthañca …pe… davatthañca sukhatthañca … davatthañca bhesajjatthañca … davatthañca dānatthañca … davatthañca puññatthañca … davatthañca yaññatthañca … davatthañca saggatthañca … davatthañca bījatthañca … davatthañca vīmaṁsatthañca ceteti upakkamati muccati, āpatti saṅghādisesassa. Ekamūlakassa baddhacakkaṁ niṭṭhitaṁ. Ārogyatthañca sukhatthañca bhesajjatthañca ceteti upakkamati muccati, āpatti saṅghādisesassa …pe… ārogyatthañca sukhatthañca davatthañca ceteti upakkamati muccati, āpatti saṅghādisesassa. Dumūlakassa khaṇḍacakkaṁ. Sukhatthañca bhesajjatthañca dānatthañca ceteti upakkamati muccati, āpatti saṅghādisesassa …pe… sukhatthañca bhesajjatthañca davatthañca …pe… sukhatthañca bhesajjatthañca ārogyatthañca ceteti upakkamati muccati, āpatti saṅghādisesassa. Dumūlakassa baddhacakkaṁ, saṅkhittaṁ. Vīmaṁsatthañca davatthañca ārogyatthañca ceteti upakkamati muccati, āpatti saṅghādisesassa …pe… vīmaṁsatthañca davatthañca bījatthañca ceteti upakkamati muccati, āpatti saṅghādisesassa. Dumūlakaṁ niṭṭhitaṁ. Timūlakampi catumūlakampi pañcamūlakampi chamūlakampi sattamūlakampi aṭṭhamūlakampi navamūlakampi evameva vitthāretabbaṁ. Idaṁ sabbamūlakaṁ. Ārogyatthañca sukhatthañca bhesajjatthañca dānatthañca puññatthañca yaññatthañca saggatthañca bījatthañca vīmaṁsatthañca davatthañca ceteti upakkamati muccati, āpatti saṅghādisesassa. Sabbamūlakaṁ niṭṭhitaṁ. Nīlañca pītakañca ceteti upakkamati muccati, āpatti saṅghādisesassa. Nīlañca lohitakañca …pe… nīlañca odātañca … nīlañca takkavaṇṇañca … nīlañca dakavaṇṇañca … nīlañca telavaṇṇañca … nīlañca khīravaṇṇañca … nīlañca dadhivaṇṇañca … nīlañca sappivaṇṇañca ceteti upakkamati muccati, āpatti saṅghādisesassa. Ekamūlakassa khaṇḍacakkaṁ niṭṭhitaṁ. Pītakañca lohitakañca ceteti upakkamati muccati, āpatti saṅghādisesassa. Pītakañca odātañca …pe… pītakañca takkavaṇṇañca … pītakañca dakavaṇṇañca … pītakañca telavaṇṇañca … pītakañca khīravaṇṇañca … pītakañca dadhivaṇṇañca … pītakañca sappivaṇṇañca ceteti upakkamati muccati, āpatti saṅghādisesassa. Pītakañca nīlañca ceteti upakkamati muccati, āpatti saṅghādisesassa. Ekamūlakassa baddhacakkaṁ. Lohitakañca odātañca ceteti upakkamati muccati, āpatti saṅghādisesassa. Lohitakañca takkavaṇṇañca …pe… lohitakañca dakavaṇṇañca … lohitakañca telavaṇṇañca … lohitakañca khīravaṇṇañca … lohitakañca dadhivaṇṇañca … lohitakañca sappivaṇṇañca ceteti upakkamati muccati, āpatti saṅghādisesassa. Lohitakañca nīlañca …pe… lohitakañca pītakañca ceteti upakkamati muccati, āpatti saṅghādisesassa. Odātañca takkavaṇṇañca …pe… odātañca dakavaṇṇañca … odātañca telavaṇṇañca … odātañca khīravaṇṇañca … odātañca dadhivaṇṇañca … odātañca sappivaṇṇañca ceteti upakkamati muccati, āpatti saṅghādisesassa. Odātañca nīlañca …pe… odātañca pītakañca … odātañca lohitakañca ceteti upakkamati muccati, āpatti saṅghādisesassa. Takkavaṇṇañca dakavaṇṇañca …pe… takkavaṇṇañca telavaṇṇañca … takkavaṇṇañca khīravaṇṇañca … takkavaṇṇañca dadhivaṇṇañca … takkavaṇṇañca sappivaṇṇañca ceteti upakkamati muccati, āpatti saṅghādisesassa. Takkavaṇṇañca nīlañca …pe… takkavaṇṇañca pītakañca … takkavaṇṇañca lohitakañca … takkavaṇṇañca odātañca ceteti upakkamati muccati, āpatti saṅghādisesassa. Dakavaṇṇañca telavaṇṇañca …pe… dakavaṇṇañca khīravaṇṇañca … dakavaṇṇañca dadhivaṇṇañca … dakavaṇṇañca sappivaṇṇañca ceteti upakkamati muccati, āpatti saṅghādisesassa. Dakavaṇṇañca nīlañca …pe… dakavaṇṇañca pītakañca … dakavaṇṇañca lohitakañca … dakavaṇṇañca odātañca … dakavaṇṇañca takkavaṇṇañca ceteti upakkamati muccati, āpatti saṅghādisesassa. Telavaṇṇañca khīravaṇṇañca …pe… telavaṇṇañca dadhivaṇṇañca … telavaṇṇañca sappivaṇṇañca ceteti upakkamati muccati, āpatti saṅghādisesassa. Telavaṇṇañca nīlañca …pe… telavaṇṇañca pītakañca … telavaṇṇañca lohitakañca … telavaṇṇañca odātañca … telavaṇṇañca takkavaṇṇañca … telavaṇṇañca dakavaṇṇañca ceteti upakkamati muccati, āpatti saṅghādisesassa. Khīravaṇṇañca dadhivaṇṇañca …pe… khīravaṇṇañca sappivaṇṇañca ceteti upakkamati muccati, āpatti saṅghādisesassa. Khīravaṇṇañca nīlañca …pe… khīravaṇṇañca pītakañca … khīravaṇṇañca lohitakañca … khīravaṇṇañca odātañca … khīravaṇṇañca takkavaṇṇañca … khīravaṇṇañca dakavaṇṇañca … khīravaṇṇañca telavaṇṇañca ceteti upakkamati muccati, āpatti saṅghādisesassa. Dadhivaṇṇañca sappivaṇṇañca ceteti upakkamati muccati, āpatti saṅghādisesassa. Dadhivaṇṇañca nīlañca …pe… dadhivaṇṇañca pītakañca … dadhivaṇṇañca lohitakañca … dadhivaṇṇañca odātañca … dadhivaṇṇañca takkavaṇṇañca … dadhivaṇṇañca dakavaṇṇañca … dadhivaṇṇañca telavaṇṇañca … dadhivaṇṇañca khīravaṇṇañca ceteti upakkamati muccati, āpatti saṅghādisesassa. Sappivaṇṇañca nīlañca ceteti upakkamati muccati, āpatti saṅghādisesassa. Sappivaṇṇañca pītakañca …pe… sappivaṇṇañca lohitakañca … sappivaṇṇañca odātañca … sappivaṇṇañca takkavaṇṇañca … sappivaṇṇañca dakavaṇṇañca … sappivaṇṇañca telavaṇṇañca … sappivaṇṇañca khīravaṇṇañca … sappivaṇṇañca dadhivaṇṇañca ceteti upakkamati muccati, āpatti saṅghādisesassa. Ekamūlakassa baddhacakkaṁ niṭṭhitaṁ. Nīlañca pītakañca lohitakañca ceteti upakkamati muccati, āpatti saṅghādisesassa …pe… nīlañca pītakañca sappivaṇṇañca ceteti upakkamati muccati, āpatti saṅghādisesassa. Dumūlakassa khaṇḍacakkaṁ. Pītakañca lohitakañca odātañca ceteti upakkamati muccati, āpatti saṅghādisesassa …pe… pītakañca lohitakañca sappivaṇṇañca …pe… pītakañca lohitakañca nīlañca ceteti upakkamati muccati, āpatti saṅghādisesassa. Dumūlakassa baddhacakkaṁ, saṅkhittaṁ. Dadhivaṇṇañca sappivaṇṇañca nīlañca ceteti upakkamati muccati, āpatti saṅghādisesassa …pe… dadhivaṇṇañca sappivaṇṇañca khīravaṇṇañca ceteti upakkamati muccati, āpatti saṅghādisesassa. Dumūlakaṁ niṭṭhitaṁ. Timūlakampi catumūlakampi pañcamūlakampi chamūlakampi sattamūlakampi aṭṭhamūlakampi navamūlakampi evameva vitthāretabbaṁ. Idaṁ sabbamūlakaṁ. Nīlañca pītakañca lohitakañca odātañca takkavaṇṇañca dakavaṇṇañca telavaṇṇañca khīravaṇṇañca dadhivaṇṇañca sappivaṇṇañca ceteti upakkamati muccati, āpatti saṅghādisesassa. Sabbamūlakaṁ niṭṭhitaṁ. Ārogyatthañca nīlañca ceteti upakkamati muccati, āpatti saṅghādisesassa. Ārogyatthañca sukhatthañca nīlañca pītakañca ceteti upakkamati muccati, āpatti saṅghādisesassa. Ārogyatthañca sukhatthañca bhesajjatthañca nīlañca pītakañca lohitakañca ceteti upakkamati muccati, āpatti saṅghādisesassa. (Ubhatovaḍḍhakaṁ evameva vaḍḍhetabbaṁ.) Ārogyatthañca sukhatthañca bhesajjatthañca dānatthañca puññatthañca yaññatthañca saggatthañca bījatthañca vīmaṁsatthañca davatthañca nīlañca pītakañca lohitakañca odātañca takkavaṇṇañca dakavaṇṇañca telavaṇṇañca khīravaṇṇañca dadhivaṇṇañca sappivaṇṇañca ceteti upakkamati muccati, āpatti saṅghādisesassa. Missakacakkaṁ niṭṭhitaṁ. Nīlaṁ mocessāmīti ceteti upakkamati pītakaṁ muccati, āpatti saṅghādisesassa. Nīlaṁ mocessāmīti ceteti upakkamati lohitakaṁ …pe… odātaṁ … takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ … sappivaṇṇaṁ muccati, āpatti saṅghādisesassa. Khaṇḍacakkaṁ niṭṭhitaṁ. Pītakaṁ mocessāmīti ceteti upakkamati lohitakaṁ muccati, āpatti saṅghādisesassa. Pītakaṁ mocessāmīti ceteti upakkamati odātaṁ …pe… takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ … sappivaṇṇaṁ … nīlaṁ muccati, āpatti saṅghādisesassa. Baddhacakkamūlaṁ saṅkhittaṁ. (…) Sappivaṇṇaṁ mocessāmīti ceteti upakkamati nīlaṁ muccati, āpatti saṅghādisesassa. Sappivaṇṇaṁ mocessāmīti ceteti upakkamati pītakaṁ …pe… lohitakaṁ … odātaṁ … takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ muccati, āpatti saṅghādisesassa. Kucchicakkaṁ niṭṭhitaṁ. Pītakaṁ mocessāmīti ceteti upakkamati nīlaṁ muccati, āpatti saṅghādisesassa. Lohitakaṁ …pe… odātaṁ … takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ … sappivaṇṇaṁ mocessāmīti ceteti upakkamati nīlaṁ muccati, āpatti saṅghādisesassa. Piṭṭhicakkassa paṭhamaṁ gamanaṁ niṭṭhitaṁ. Lohitakaṁ mocessāmīti ceteti upakkamati pītakaṁ muccati, āpatti saṅghādisesassa. Odātaṁ …pe… takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ … sappivaṇṇaṁ … nīlaṁ mocessāmīti ceteti upakkamati pītakaṁ muccati, āpatti saṅghādisesassa. Piṭṭhicakkassa dutiyaṁ gamanaṁ niṭṭhitaṁ. Odātaṁ mocessāmīti ceteti upakkamati lohitakaṁ muccati, āpatti saṅghādisesassa. Takkavaṇṇaṁ …pe… dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ … sappivaṇṇaṁ … nīlaṁ … pītakaṁ mocessāmīti ceteti upakkamati lohitakaṁ muccati, āpatti saṅghādisesassa. Piṭṭhicakkassa tatiyaṁ gamanaṁ niṭṭhitaṁ. Takkavaṇṇaṁ mocessāmīti ceteti upakkamati odātaṁ muccati, āpatti saṅghādisesassa. Dakavaṇṇaṁ …pe… telavaṇṇaṁ … khīravaṇṇaṁ … dadhivaṇṇaṁ … sappivaṇṇaṁ … nīlaṁ … pītakaṁ … lohitakaṁ mocessāmīti ceteti upakkamati odātaṁ muccati, āpatti saṅghādisesassa. Piṭṭhicakkassa catutthaṁ gamanaṁ niṭṭhitaṁ. Dakavaṇṇaṁ mocessāmīti ceteti upakkamati takkavaṇṇaṁ muccati, āpatti saṅghādisesassa. Telavaṇṇaṁ …pe… khīravaṇṇaṁ … dadhivaṇṇaṁ … sappivaṇṇaṁ … nīlaṁ … pītakaṁ … lohitakaṁ … odātaṁ mocessāmīti ceteti upakkamati takkavaṇṇaṁ muccati, āpatti saṅghādisesassa. Piṭṭhicakkassa pañcamaṁ gamanaṁ niṭṭhitaṁ. Telavaṇṇaṁ mocessāmīti ceteti upakkamati dakavaṇṇaṁ muccati, āpatti saṅghādisesassa. Khīravaṇṇaṁ …pe… dadhivaṇṇaṁ … sappivaṇṇaṁ … nīlaṁ … pītakaṁ … lohitakaṁ … odātaṁ … takkavaṇṇaṁ mocessāmīti ceteti upakkamati dakavaṇṇaṁ muccati, āpatti saṅghādisesassa. Piṭṭhicakkassa chaṭṭhaṁ gamanaṁ niṭṭhitaṁ. Khīravaṇṇaṁ mocessāmīti ceteti upakkamati telavaṇṇaṁ muccati, āpatti saṅghādisesassa. Dadhivaṇṇaṁ …pe… sappivaṇṇaṁ … nīlaṁ … pītakaṁ … lohitakaṁ … odātaṁ … takkavaṇṇaṁ … dakavaṇṇaṁ mocessāmīti ceteti upakkamati telavaṇṇaṁ muccati, āpatti saṅghādisesassa. Piṭṭhicakkassa sattamaṁ gamanaṁ niṭṭhitaṁ. Dadhivaṇṇaṁ mocessāmīti ceteti upakkamati khīravaṇṇaṁ muccati, āpatti saṅghādisesassa. Sappivaṇṇaṁ …pe… nīlaṁ … pītakaṁ … lohitakaṁ … odātaṁ … takkavaṇṇaṁ … dakavaṇṇaṁ … telavaṇṇaṁ mocessāmīti ceteti upakkamati khīravaṇṇaṁ muccati, āpatti saṅghādisesassa. Piṭṭhicakkassa aṭṭhamaṁ gamanaṁ niṭṭhitaṁ. Sappivaṇṇaṁ mocessāmīti ceteti upakkamati dadhivaṇṇaṁ muccati, āpatti saṅghādisesassa. Nīlaṁ …pe… pītakaṁ … lohitakaṁ … odātaṁ … takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ mocessāmīti ceteti upakkamati dadhivaṇṇaṁ muccati, āpatti saṅghādisesassa. Piṭṭhicakkassa navamaṁ gamanaṁ niṭṭhitaṁ. Nīlaṁ mocessāmīti ceteti upakkamati sappivaṇṇaṁ muccati, āpatti saṅghādisesassa. Pītakaṁ …pe… lohitakaṁ … odātaṁ … takkavaṇṇaṁ … dakavaṇṇaṁ … telavaṇṇaṁ … khīravaṇṇaṁ … dadhivaṇṇaṁ mocessāmīti ceteti upakkamati sappivaṇṇaṁ muccati, āpatti saṅghādisesassa. Piṭṭhicakkassa dasamaṁ gamanaṁ niṭṭhitaṁ. Piṭṭhicakkaṁ niṭṭhitaṁ.
Ceteti upakkamati muccati, āpatti saṅghādisesassa. Ceteti upakkamati na muccati, āpatti thullaccayassa. Ceteti na upakkamati muccati, anāpatti. Ceteti na upakkamati na muccati, anāpatti. Na ceteti upakkamati muccati, anāpatti. Na ceteti upakkamati na muccati, anāpatti. Na ceteti na upakkamati muccati, anāpatti. Na ceteti na upakkamati na muccati, anāpatti. Anāpatti— supinantena, namocanādhippāyassa, ummattakassa, khittacittassa, vedanāṭṭassa, ādikammikassāti. 1.1. Vinītavatthuuddānagāthā Supinoccārapassāvo, vitakkuṇhodakena ca; Bhesajjaṁ kaṇḍuvaṁ maggo, vatthi jantāgharupakkamo. Sāmaṇero ca sutto ca, ūru muṭṭhinā pīḷayi; Ākāse thambhaṁ nijjhāyi, chiddaṁ kaṭṭhena ghaṭṭayi. Soto udañjalaṁ dhāvaṁ, pupphāvaliyaṁ pokkharaṁ; Vālikā kaddamusseko, sayanaṅguṭṭhakena cāti.
1.2. Vinītavatthu Tena kho pana samayena aññatarassa bhikkhuno supinantena asuci mucci. Tassa kukkuccaṁ ahosi— “bhagavatā sikkhāpadaṁ paññattaṁ, kacci nu kho ahaṁ saṅghādisesaṁ āpattiṁ āpanno”ti? Bhagavato etamatthaṁ ārocesi. “Anāpatti, bhikkhu, supinantenā”ti. Tena kho pana samayena aññatarassa bhikkhuno uccāraṁ karontassa asuci mucci. Tassa kukkuccaṁ ahosi …pe… “kiṁcitto tvaṁ, bhikkhū”ti? “Nāhaṁ, bhagavā, mocanādhippāyo”ti. “Anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno passāvaṁ karontassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno kāmavitakkaṁ vitakkentassa asuci mucci. Tassa kukkuccaṁ ahosi …pe… “anāpatti, bhikkhu, vitakkentassā”ti. Tena kho pana samayena aññatarassa bhikkhuno uṇhodakena nhāyantassa asuci mucci. Tassa kukkuccaṁ ahosi …pe… “kiṁcitto tvaṁ, bhikkhū”ti? “Nāhaṁ, bhagavā, mocanādhippāyo”ti. “Anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa uṇhodakena nhāyantassa asuci mucci. Tassa kukkuccaṁ ahosi …pe… “āpattiṁ tvaṁ, bhikkhu, āpanno saṅghādisesan”ti. Tena kho pana samayena aññatarassa bhikkhuno mocanādhippāyassa uṇhodakena nhāyantassa asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno aṅgajāte vaṇo hoti. Bhesajjena ālimpentassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno aṅgajāte vaṇo hoti. Mocanādhippāyassa bhesajjena ālimpentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno aṇḍaṁ kaṇḍuvantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa aṇḍaṁ kaṇḍuvantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno maggaṁ gacchantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa maggaṁ gacchantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno vatthiṁ gahetvā passāvaṁ karontassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa vatthiṁ gahetvā passāvaṁ karontassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno jantāghare udaravaṭṭiṁ tāpentassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa jantāghare udaravaṭṭiṁ tāpentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno jantāghare upajjhāyassa piṭṭhiparikammaṁ karontassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa jantāghare upajjhāyassa piṭṭhiparikammaṁ karontassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno ūruṁ ghaṭṭāpentassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa ūruṁ ghaṭṭāpentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññataro bhikkhu mocanādhippāyo aññataraṁ sāmaṇeraṁ etadavoca— “ehi me tvaṁ, āvuso sāmaṇera, aṅgajātaṁ gaṇhāhī”ti. So tassa aṅgajātaṁ aggahesi. Tasseva asuci mucci. Tassa kukkuccaṁ ahosi …pe… “āpattiṁ tvaṁ, bhikkhu, āpanno saṅghādisesan”ti. Tena kho pana samayena aññataro bhikkhu suttassa sāmaṇerassa aṅgajātaṁ aggahesi. Tasseva asuci mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti dukkaṭassā”ti. Tena kho pana samayena aññatarassa bhikkhuno mocanādhippāyassa ūrūhi aṅgajātaṁ pīḷentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno mocanādhippāyassa muṭṭhinā aṅgajātaṁ pīḷentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno mocanādhippāyassa ākāse kaṭiṁ kampentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno kāyaṁ thambhentassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa kāyaṁ thambhentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññataro bhikkhu sāratto mātugāmassa aṅgajātaṁ upanijjhāyi. Tassa asuci mucci. Tassa kukkuccaṁ ahosi …pe… “anāpatti, bhikkhu, saṅghādisesassa. Na ca, bhikkhave, sārattena mātugāmassa aṅgajātaṁ upanijjhāyitabbaṁ. Yo upanijjhāyeyya, āpatti dukkaṭassā”ti. Tena kho pana samayena aññatarassa bhikkhuno mocanādhippāyassa tāḷacchiddaṁ aṅgajātaṁ pavesentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno mocanādhippāyassa kaṭṭhena aṅgajātaṁ ghaṭṭentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno paṭisote nhāyantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa paṭisote nhāyantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno udañjalaṁ kīḷantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa udañjalaṁ kīḷantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno udake dhāvantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa udake dhāvantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno pupphāvaliyaṁ kīḷantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa pupphāvaliyaṁ kīḷantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno pokkharavane dhāvantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa pokkharavane dhāvantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno mocanādhippāyassa vālikaṁ aṅgajātaṁ pavesentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno mocanādhippāyassa kaddamaṁ aṅgajātaṁ pavesentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno udakena aṅgajātaṁ osiñcantassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno mocanādhippāyassa udakena aṅgajātaṁ osiñcantassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno mocanādhippāyassa sayane aṅgajātaṁ ghaṭṭentassa asuci mucci …pe… asuci na mucci. Tassa kukkuccaṁ ahosi …pe… “anāpatti, bhikkhu, saṅghādisesassa; āpatti thullaccayassā”ti. Tena kho pana samayena aññatarassa bhikkhuno mocanādhippāyassa aṅguṭṭhena aṅgajātaṁ ghaṭṭentassa asuci mucci …pe… asuci na mucci. Tassa kukkuccaṁ ahosi— “bhagavatā sikkhāpadaṁ paññattaṁ, kacci nu kho ahaṁ saṅghādisesaṁ āpattiṁ āpanno”ti? Bhagavato etamatthaṁ ārocesi. “Anāpatti, bhikkhu, saṅghādisesassa; āpatti thullaccayassā”ti. Sukkavissaṭṭhisikkhāpadaṁ niṭṭhitaṁ paṭhamaṁ.