← _

Parivāra Bhikkhuvibhaṅga

id: pli-tv-pvr1.10 VRI: vol 91 สยามรัฐ: vol 8 93 segments
Parivāra Bhikkhuvibhaṅga Dutiyabhāga 1.10 Katāpattivāra 1. Pārājikakaṇḍa
Methunaṁ dhammaṁ paṭisevanapaccayā kati āpattiyo āpajjati? Methunaṁ dhammaṁ paṭisevanapaccayā catasso āpattiyo āpajjati— akkhāyite sarīre methunaṁ dhammaṁ paṭisevati, āpatti pārājikassa; yebhuyyena khāyite sarīre methunaṁ dhammaṁ paṭisevati, āpatti thullaccayassa; vaṭṭakate mukhe acchupantaṁ aṅgajātaṁ paveseti, āpatti dukkaṭassa; jatumaṭṭhake pācittiyaṁ— methunaṁ dhammaṁ paṭisevanapaccayā imā catasso āpattiyo āpajjati.
Adinnaṁ ādiyanapaccayā kati āpattiyo āpajjati? Adinnaṁ ādiyanapaccayā tisso āpattiyo āpajjati. Pañcamāsakaṁ vā atirekapañcamāsakaṁ vā agghanakaṁ adinnaṁ theyyasaṅkhātaṁ ādiyati, āpatti pārājikassa; atirekamāsakaṁ vā ūnapañcamāsakaṁ vā agghanakaṁ adinnaṁ theyyasaṅkhātaṁ ādiyati, āpatti thullaccayassa; māsakaṁ vā ūnamāsakaṁ vā agghanakaṁ adinnaṁ theyyasaṅkhātaṁ ādiyati, āpatti dukkaṭassa— adinnaṁ ādiyanapaccayā imā tisso āpattiyo āpajjati.
Sañcicca manussaviggahaṁ jīvitā voropanapaccayā kati āpattiyo āpajjati? Sañcicca manussaviggahaṁ jīvitā voropanapaccayā tisso āpattiyo āpajjati. Manussaṁ odissa opātaṁ khaṇati “papatitvā marissatī”ti, āpatti dukkaṭassa; papatite dukkhā vedanā uppajjati, āpatti thullaccayassa; marati, āpatti pārājikassa— sañcicca manussaviggahaṁ jīvitā voropanapaccayā imā tisso āpattiyo āpajjati.
Asantaṁ abhūtaṁ uttarimanussadhammaṁ ullapanapaccayā kati āpattiyo āpajjati? Asantaṁ abhūtaṁ uttarimanussadhammaṁ ullapanapaccayā tisso āpattiyo āpajjati— pāpiccho icchāpakato asantaṁ abhūtaṁ uttarimanussadhammaṁ ullapati, āpatti pārājikassa; “yo te vihāre vasati so bhikkhu arahā”ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa— asantaṁ abhūtaṁ uttarimanussadhammaṁ ullapanapaccayā imā tisso āpattiyo āpajjati.
Cattāro pārājikā niṭṭhitā.
2. Saṅghādisesakaṇḍādi Upakkamitvā asucimocanapaccayā kati āpattiyo āpajjati? Upakkamitvā asucimocanapaccayā tisso āpattiyo āpajjati— ceteti upakkamati muccati, āpatti saṅghādisesassa; ceteti upakkamati na muccati, āpatti thullaccayassa; payoge dukkaṭaṁ— upakkamitvā asucimocanapaccayā imā tisso āpattiyo āpajjati.
Kāyasaṁsaggaṁ samāpajjanapaccayā kati āpattiyo āpajjati? Kāyasaṁsaggaṁ samāpajjanapaccayā pañca āpattiyo āpajjati— avassutā bhikkhunī avassutassa purisapuggalassa adhakkhakaṁ ubbhajāṇumaṇḍalaṁ gahaṇaṁ sādiyati, āpatti pārājikassa; bhikkhu kāyena kāyaṁ āmasati, āpatti saṅghādisesassa; kāyena kāyapaṭibaddhaṁ āmasati, āpatti thullaccayassa; kāyapaṭibaddhena kāyapaṭibaddhaṁ āmasati, āpatti dukkaṭassa; aṅgulipatodake pācittiyaṁ— kāyasaṁsaggaṁ samāpajjanapaccayā imā pañca āpattiyo āpajjati.
Mātugāmaṁ duṭṭhullāhi vācāhi obhāsanapaccayā tisso āpattiyo āpajjati— vaccamaggaṁ passāvamaggaṁ ādissa vaṇṇampi bhaṇati avaṇṇampi bhaṇati, āpatti saṅghādisesassa; vaccamaggaṁ passāvamaggaṁ ṭhapetvā adhakkhakaṁ ubbhajāṇumaṇḍalaṁ ādissa vaṇṇampi bhaṇati avaṇṇampi bhaṇati, āpatti thullaccayassa; kāyapaṭibaddhaṁ ādissa vaṇṇampi bhaṇati avaṇṇampi bhaṇati, āpatti dukkaṭassa.
Attakāmapāricariyāya vaṇṇaṁ bhāsanapaccayā tisso āpattiyo āpajjati— mātugāmassa santike attakāmapāricariyāya vaṇṇaṁ bhāsati, āpatti saṅghādisesassa; paṇḍakassa santike attakāmapāricariyāya vaṇṇaṁ bhāsati, āpatti thullaccayassa; tiracchānagatassa santike attakāmapāricariyāya vaṇṇaṁ bhāsati, āpatti dukkaṭassa.
Sañcarittaṁ samāpajjanapaccayā tisso āpattiyo āpajjati— paṭiggaṇhāti vīmaṁsati paccāharati, āpatti saṅghādisesassa; paṭiggaṇhāti vīmaṁsati na paccāharati, āpatti thullaccayassa; paṭiggaṇhāti na vīmaṁsati na paccāharati, āpatti dukkaṭassa.
Saññācikāya kuṭiṁ kārāpanapaccayā tisso āpattiyo āpajjati— kārāpeti, payoge dukkaṭaṁ; ekaṁ piṇḍaṁ anāgate āpatti thullaccayassa; tasmiṁ piṇḍe āgate āpatti saṅghādisesassa.
Mahallakaṁ vihāraṁ kārāpanapaccayā tisso āpattiyo āpajjati— kārāpeti, payoge dukkaṭaṁ; ekaṁ piṇḍaṁ anāgate, āpatti thullaccayassa; tasmiṁ piṇḍe āgate āpatti saṅghādisesassa.
Bhikkhuṁ amūlakena pārājikena dhammena anuddhaṁsanapaccayā tisso āpattiyo āpajjati— anokāsaṁ kārāpetvā cāvanādhippāyo vadeti, āpatti saṅghādisesena dukkaṭassa; okāsaṁ kārāpetvā akkosādhippāyo vadeti, āpatti omasavādassa.
Bhikkhuṁ aññabhāgiyassa adhikaraṇassa kiñci desaṁ lesamattaṁ upādāya pārājikena dhammena anuddhaṁsanapaccayā tisso āpattiyo āpajjati— anokāsaṁ kārāpetvā cāvanādhippāyo vadeti, āpatti saṅghādisesena dukkaṭassa; okāsaṁ kārāpetvā akkosādhippāyo vadeti, āpatti omasavādassa.
Saṅghabhedako bhikkhu yāvatatiyaṁ samanubhāsanāya na paṭinissajjanapaccayā tisso āpattiyo āpajjati— ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa.
Bhedakānuvattakā bhikkhū yāvatatiyaṁ samanubhāsanāya na paṭinissajjanapaccayā tisso āpattiyo āpajjanti— ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa.
Dubbaco bhikkhu yāvatatiyaṁ samanubhāsanāya na paṭinissajjanapaccayā tisso āpattiyo āpajjati— ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa.
Kuladūsako bhikkhu yāvatatiyaṁ samanubhāsanāya na paṭinissajjanapaccayā tisso āpattiyo āpajjati— ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa …pe….
Anādariyaṁ paṭicca udake uccāraṁ vā passāvaṁ vā kheḷaṁ vā karaṇapaccayā kati āpattiyo āpajjati? Anādariyaṁ paṭicca udake uccāraṁ vā passāvaṁ vā kheḷaṁ vā karaṇapaccayā ekaṁ āpattiṁ āpajjati. Dukkaṭaṁ— anādariyaṁ paṭicca udake uccāraṁ vā passāvaṁ vā kheḷaṁ vā karaṇapaccayā imaṁ ekaṁ āpattiṁ āpajjati.
Katāpattivāro niṭṭhito dutiyo.