← _

Parivāra Bhikkhuvibhaṅga

id: pli-tv-pvr1.2 VRI: vol 91 สยามรัฐ: vol 8 667 segments
Parivāra Bhikkhuvibhaṅga Paṭhamabhāga 1.2 Katāpattivāra 1. Pārājikakaṇḍa
Methunaṁ dhammaṁ paṭisevanto kati āpattiyo āpajjati? Methunaṁ dhammaṁ paṭisevanto tisso āpattiyo āpajjati. Akkhāyite sarīre methunaṁ dhammaṁ paṭisevati, āpatti pārājikassa; yebhuyyena khāyite sarīre methunaṁ dhammaṁ paṭisevati, āpatti thullaccayassa; vaṭṭakate mukhe acchupantaṁ aṅgajātaṁ paveseti, āpatti dukkaṭassa— methunaṁ dhammaṁ paṭisevanto imā tisso āpattiyo āpajjati.
Adinnaṁ ādiyanto kati āpattiyo āpajjati? Adinnaṁ ādiyanto tisso āpattiyo āpajjati. Pañcamāsakaṁ vā atirekapañcamāsakaṁ vā agghanakaṁ adinnaṁ theyyasaṅkhātaṁ ādiyati, āpatti pārājikassa; atirekamāsakaṁ vā ūnapañcamāsakaṁ vā agghanakaṁ adinnaṁ theyyasaṅkhātaṁ ādiyati, āpatti thullaccayassa; māsakaṁ vā ūnamāsakaṁ vā agghanakaṁ adinnaṁ theyyasaṅkhātaṁ ādiyati, āpatti dukkaṭassa— adinnaṁ ādiyanto imā tisso āpattiyo āpajjati.
Sañcicca manussaviggahaṁ jīvitā voropento kati āpattiyo āpajjati? Sañcicca manussaviggahaṁ jīvitā voropento tisso āpattiyo āpajjati. Manussaṁ odissa opātaṁ khaṇati “papatitvā marissatī”ti, āpatti dukkaṭassa; papatite dukkhā vedanā uppajjati, āpatti thullaccayassa; marati, āpatti pārājikassa— sañcicca manussaviggahaṁ jīvitā voropento imā tisso āpattiyo āpajjati.
Asantaṁ abhūtaṁ uttarimanussadhammaṁ ullapanto kati āpattiyo āpajjati? Asantaṁ abhūtaṁ uttarimanussadhammaṁ ullapanto tisso āpattiyo āpajjati. Pāpiccho icchāpakato asantaṁ abhūtaṁ uttarimanussadhammaṁ ullapati, āpatti pārājikassa; “yo te vihāre vasati, so bhikkhu arahā”ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa— asantaṁ abhūtaṁ uttarimanussadhammaṁ ullapanto imā tisso āpattiyo āpajjati.
Cattāro pārājikā niṭṭhitā.
2. Saṅghādisesakaṇḍa (…) Upakkamitvā asuciṁ mocento tisso āpattiyo āpajjati. Ceteti upakkamati muccati, āpatti saṅghādisesassa; ceteti upakkamati na muccati, āpatti thullaccayassa; payoge dukkaṭaṁ.
Mātugāmena saddhiṁ kāyasaṁsaggaṁ samāpajjanto tisso āpattiyo āpajjati. Kāyena kāyaṁ āmasati, āpatti saṅghādisesassa; kāyena kāyapaṭibaddhaṁ āmasati, āpatti thullaccayassa; kāyapaṭibaddhena kāyapaṭibaddhaṁ āmasati, āpatti dukkaṭassa.
Mātugāmaṁ duṭṭhullāhi vācāhi obhāsento tisso āpattiyo āpajjati. Vaccamaggaṁ passāvamaggaṁ ādissa vaṇṇampi bhaṇati, avaṇṇampi bhaṇati, āpatti saṅghādisesassa; vaccamaggaṁ passāvamaggaṁ ṭhapetvā adhakkhakaṁ ubbhajāṇumaṇḍalaṁ ādissa vaṇṇampi bhaṇati avaṇṇampi bhaṇati, āpatti thullaccayassa; kāyapaṭibaddhaṁ ādissa vaṇṇampi bhaṇati avaṇṇampi bhaṇati, āpatti dukkaṭassa.
Attakāmapāricariyāya vaṇṇaṁ bhāsanto tisso āpattiyo āpajjati. Mātugāmassa santike attakāmapāricariyāya vaṇṇaṁ bhāsati, āpatti saṅghādisesassa; paṇḍakassa santike attakāmapāricariyāya vaṇṇaṁ bhāsati, āpatti thullaccayassa; tiracchānagatassa santike attakāmapāricariyāya vaṇṇaṁ bhāsati, āpatti dukkaṭassa.
Sañcarittaṁ samāpajjanto tisso āpattiyo āpajjati. Paṭiggaṇhāti vīmaṁsati paccāharati, āpatti saṅghādisesassa; paṭiggaṇhāti vīmaṁsati na paccāharati, āpatti thullaccayassa; paṭiggaṇhāti na vīmaṁsati na paccāharati, āpatti dukkaṭassa.
Saññācikāya kuṭiṁ kārāpento tisso āpattiyo āpajjati. Kārāpeti, payoge dukkaṭaṁ; ekaṁ piṇḍaṁ anāgate, āpatti thullaccayassa; tasmiṁ piṇḍe āgate, āpatti saṅghādisesassa.
Mahallakaṁ vihāraṁ kārāpento tisso āpattiyo āpajjati. Kārāpeti, payoge dukkaṭaṁ; ekaṁ piṇḍaṁ anāgate, āpatti thullaccayassa; tasmiṁ piṇḍe āgate, āpatti saṅghādisesassa.
Bhikkhuṁ amūlakena pārājikena dhammena anuddhaṁsento tisso āpattiyo āpajjati. Anokāsaṁ kārāpetvā cāvanādhippāyo vadeti, āpatti saṅghādisesena dukkaṭassa; okāsaṁ kārāpetvā akkosādhippāyo vadeti, āpatti omasavādassa.
Bhikkhuṁ aññabhāgiyassa adhikaraṇassa kiñci desaṁ lesamattaṁ upādāya pārājikena dhammena anuddhaṁsento tisso āpattiyo āpajjati. Anokāsaṁ kārāpetvā cāvanādhippāyo vadeti, āpatti saṅghādisesena dukkaṭassa; okāsaṁ kārāpetvā akkosādhippāyo vadeti, āpatti omasavādassa.
Saṅghabhedako bhikkhu yāvatatiyaṁ samanubhāsanāya na paṭinissajjanto tisso āpattiyo āpajjati. Ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa.
Bhedakānuvattakā bhikkhū yāvatatiyaṁ samanubhāsanāya na paṭinissajjantā tisso āpattiyo āpajjanti. Ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa.
Dubbaco bhikkhu yāvatatiyaṁ samanubhāsanāya na paṭinissajjanto tisso āpattiyo āpajjati. Ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa.
Kuladūsako bhikkhu yāvatatiyaṁ samanubhāsanāya na paṭinissajjanto tisso āpattiyo āpajjati. Ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti saṅghādisesassa.
Terasa saṅghādisesā niṭṭhitā.
4. Nissaggiyakaṇḍa 4.1. Kathinavagga Atirekacīvaraṁ dasāhaṁ atikkāmento ekaṁ āpattiṁ āpajjati. Nissaggiyaṁ pācittiyaṁ.
Ekarattaṁ ticīvarena vippavasanto ekaṁ āpattiṁ āpajjati. Nissaggiyaṁ pācittiyaṁ.
Akālacīvaraṁ paṭiggahetvā māsaṁ atikkāmento ekaṁ āpattiṁ āpajjati. Nissaggiyaṁ pācittiyaṁ.
Aññātikāya bhikkhuniyā purāṇacīvaraṁ dhovāpento dve āpattiyo āpajjati. Dhovāpeti, payoge dukkaṭaṁ; dhovāpite nissaggiyaṁ pācittiyaṁ.
Aññātikāya bhikkhuniyā hatthato cīvaraṁ paṭiggaṇhanto dve āpattiyo āpajjati. Gaṇhāti, payoge dukkaṭaṁ; gahite nissaggiyaṁ pācittiyaṁ.
Aññātakaṁ gahapatiṁ vā gahapatāniṁ vā cīvaraṁ viññāpento dve āpattiyo āpajjati. Viññāpeti, payoge dukkaṭaṁ; viññāpite nissaggiyaṁ pācittiyaṁ.
Aññātakaṁ gahapatiṁ vā gahapatāniṁ vā tatuttari cīvaraṁ viññāpento dve āpattiyo āpajjati. Viññāpeti, payoge dukkaṭaṁ; viññāpite nissaggiyaṁ pācittiyaṁ.
Pubbe appavārito aññātakaṁ gahapatikaṁ upasaṅkamitvā cīvare vikappaṁ āpajjanto dve āpattiyo āpajjati. Vikappaṁ āpajjati, payoge dukkaṭaṁ; vikappaṁ āpanne nissaggiyaṁ pācittiyaṁ.
Pubbe appavārito aññātake gahapatike upasaṅkamitvā cīvare vikappaṁ āpajjanto dve āpattiyo āpajjati. Vikappaṁ āpajjati, payoge dukkaṭaṁ; vikappaṁ āpanne nissaggiyaṁ pācittiyaṁ.
Atirekatikkhattuṁ codanāya atirekachakkhattuṁ ṭhānena cīvaraṁ abhinipphādento dve āpattiyo āpajjati. Abhinipphādeti, payoge dukkaṭaṁ; abhinipphādite nissaggiyaṁ pācittiyaṁ.
Kathinavaggo paṭhamo.
4.2. Kosiyavagga Kosiyamissakaṁ santhataṁ kārāpento dve āpattiyo āpajjati. Kārāpeti, payoge dukkaṭaṁ; kārāpite nissaggiyaṁ pācittiyaṁ.
Suddhakāḷakānaṁ eḷakalomānaṁ santhataṁ kārāpento dve āpattiyo āpajjati. Kārāpeti, payoge dukkaṭaṁ; kārāpite nissaggiyaṁ pācittiyaṁ.
Anādiyitvā tulaṁ odātānaṁ tulaṁ gocariyānaṁ navaṁ santhataṁ kārāpento dve āpattiyo āpajjati. Kārāpeti, payoge dukkaṭaṁ; kārāpite nissaggiyaṁ pācittiyaṁ.
Anuvassaṁ santhataṁ kārāpento dve āpattiyo āpajjati. Kārāpeti, payoge dukkaṭaṁ; kārāpite nissaggiyaṁ pācittiyaṁ.
Anādiyitvā purāṇasanthatassa sāmantā sugatavidatthiṁ navaṁ nisīdanasanthataṁ kārāpento dve āpattiyo āpajjati. Kārāpeti, payoge dukkaṭaṁ; kārāpite nissaggiyaṁ pācittiyaṁ.
Eḷakalomāni paṭiggahetvā tiyojanaṁ atikkāmento dve āpattiyo āpajjati. Paṭhamaṁ pādaṁ tiyojanaṁ atikkāmeti, āpatti dukkaṭassa; dutiyaṁ pādaṁ atikkāmeti, nissaggiyaṁ pācittiyaṁ.
Aññātikāya bhikkhuniyā eḷakalomāni dhovāpento dve āpattiyo āpajjati. Dhovāpeti, payoge dukkaṭaṁ; dhovāpite nissaggiyaṁ pācittiyaṁ.
Rūpiyaṁ paṭiggaṇhanto dve āpattiyo āpajjati. Gaṇhāti, payoge dukkaṭaṁ; gahite nissaggiyaṁ pācittiyaṁ.
Nānappakārakaṁ rūpiyasaṁvohāraṁ samāpajjanto dve āpattiyo āpajjati. Samāpajjati, payoge dukkaṭaṁ; samāpanne nissaggiyaṁ pācittiyaṁ.
Nānappakārakaṁ kayavikkayaṁ samāpajjanto dve āpattiyo āpajjati. Samāpajjati, payoge dukkaṭaṁ; samāpanne nissaggiyaṁ pācittiyaṁ.
Kosiyavaggo dutiyo.
4.3. Pattavagga Atirekapattaṁ dasāhaṁ atikkāmento ekaṁ āpattiṁ āpajjati. Nissaggiyaṁ pācittiyaṁ.
Ūnapañcabandhanena pattena aññaṁ navaṁ pattaṁ cetāpento dve āpattiyo āpajjati. Cetāpeti, payoge dukkaṭaṁ; cetāpite nissaggiyaṁ pācittiyaṁ.
Bhesajjāni paṭiggahetvā sattāhaṁ atikkāmento ekaṁ āpattiṁ āpajjati. Nissaggiyaṁ pācittiyaṁ.
Atirekamāse sese gimhāne vassikasāṭikacīvaraṁ pariyesanto dve āpattiyo āpajjati. Pariyesati, payoge dukkaṭaṁ; pariyiṭṭhe nissaggiyaṁ pācittiyaṁ.
Bhikkhussa sāmaṁ cīvaraṁ datvā kupito anattamano acchindanto dve āpattiyo āpajjati. Acchindati, payoge dukkaṭaṁ; acchinne nissaggiyaṁ pācittiyaṁ.
Sāmaṁ suttaṁ viññāpetvā tantavāyehi cīvaraṁ vāyāpento dve āpattiyo āpajjati. Vāyāpeti, payoge dukkaṭaṁ; vāyāpite nissaggiyaṁ pācittiyaṁ.
Pubbe appavārito aññātakassa gahapatikassa tantavāye upasaṅkamitvā cīvare vikappaṁ āpajjanto dve āpattiyo āpajjati. Vikappaṁ āpajjati, payoge dukkaṭaṁ; vikappaṁ āpanne nissaggiyaṁ pācittiyaṁ.
Accekacīvaraṁ paṭiggahetvā cīvarakālasamayaṁ atikkāmento ekaṁ āpattiṁ āpajjati. Nissaggiyaṁ pācittiyaṁ.
Tiṇṇaṁ cīvarānaṁ aññataraṁ cīvaraṁ antaraghare nikkhipitvā atirekachārattaṁ vippavasanto ekaṁ āpattiṁ āpajjati. Nissaggiyaṁ pācittiyaṁ.
Jānaṁ saṅghikaṁ lābhaṁ pariṇataṁ attano pariṇāmento dve āpattiyo āpajjati. Pariṇāmeti, payoge dukkaṭaṁ; pariṇāmite nissaggiyaṁ pācittiyaṁ.
Pattavaggo tatiyo. Tiṁsa nissaggiyā pācittiyā niṭṭhitā.
5. Pācittiyakaṇḍa 5.1. Musāvādavagga Sampajānamusāvādaṁ bhāsanto kati āpattiyo āpajjati? Sampajānamusāvādaṁ bhāsanto pañca āpattiyo āpajjati. Pāpiccho icchāpakato asantaṁ abhūtaṁ uttarimanussadhammaṁ ullapati, āpatti pārājikassa; bhikkhuṁ amūlakena pārājikena dhammena anuddhaṁseti, āpatti saṅghādisesassa; “yo te vihāre vasati, so bhikkhu arahā”ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa; sampajānamusāvāde pācittiyaṁ— sampajānamusāvādaṁ bhāsanto imā pañca āpattiyo āpajjati.
Omasanto dve āpattiyo āpajjati. Upasampannaṁ omasati, āpatti pācittiyassa; anupasampannaṁ omasati, āpatti dukkaṭassa.
Pesuññaṁ upasaṁharanto dve āpattiyo āpajjati. Upasampannassa pesuññaṁ upasaṁharati, āpatti pācittiyassa; anupasampannassa pesuññaṁ upasaṁharati, āpatti dukkaṭassa.
Anupasampannaṁ padaso dhammaṁ vācento dve āpattiyo āpajjati. Vāceti, payoge dukkaṭaṁ; pade pade āpatti pācittiyassa.
Anupasampannena uttaridirattatirattaṁ sahaseyyaṁ kappento dve āpattiyo āpajjati. Nipajjati, payoge dukkaṭaṁ; nipanne āpatti pācittiyassa.
Mātugāmena sahaseyyaṁ kappento dve āpattiyo āpajjati. Nipajjati, payoge dukkaṭaṁ; nipanne āpatti pācittiyassa.
Mātugāmassa uttarichappañcavācāhi dhammaṁ desento dve āpattiyo āpajjati. Deseti, payoge dukkaṭaṁ; pade pade āpatti pācittiyassa.
Anupasampannassa uttarimanussadhammaṁ bhūtaṁ ārocento dve āpattiyo āpajjati. Āroceti, payoge dukkaṭaṁ; ārocite āpatti pācittiyassa.
Bhikkhussa duṭṭhullaṁ āpattiṁ anupasampannassa ārocento dve āpattiyo āpajjati. Āroceti, payoge dukkaṭaṁ; ārocite āpatti pācittiyassa.
Pathaviṁ khaṇanto dve āpattiyo āpajjati. Khaṇati, payoge dukkaṭaṁ; pahāre pahāre āpatti pācittiyassa.
Musāvādavaggo paṭhamo.
5.2. Bhūtagāmavagga Bhūtagāmaṁ pātento dve āpattiyo āpajjati. Pāteti, payoge dukkaṭaṁ; pahāre pahāre āpatti pācittiyassa.
Aññenaññaṁ paṭicaranto dve āpattiyo āpajjati. Anāropite aññavādake aññenaññaṁ paṭicarati, āpatti dukkaṭassa; āropite aññavādake aññenaññaṁ paṭicarati, āpatti pācittiyassa.
Bhikkhuṁ ujjhāpento dve āpattiyo āpajjati. Ujjhāpeti, payoge dukkaṭaṁ; ujjhāpite āpatti pācittiyassa.
Saṅghikaṁ mañcaṁ vā pīṭhaṁ vā bhisiṁ vā kocchaṁ vā ajjhokāse santharitvā anuddharitvā anāpucchā pakkamanto dve āpattiyo āpajjati. Paṭhamaṁ pādaṁ leḍḍupātaṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa.
Saṅghike vihāre seyyaṁ santharitvā anuddharitvā anāpucchā pakkamanto dve āpattiyo āpajjati. Paṭhamaṁ pādaṁ parikkhepaṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa.
Saṅghike vihāre jānaṁ pubbupagataṁ bhikkhuṁ anupakhajja seyyaṁ kappento dve āpattiyo āpajjati. Nipajjati, payoge dukkaṭaṁ; nipanne āpatti pācittiyassa.
Bhikkhuṁ kupito anattamano saṅghikā vihārā nikkaḍḍhento dve āpattiyo āpajjati. Nikkaḍḍhati, payoge dukkaṭaṁ; nikkaḍḍhite āpatti pācittiyassa.
Saṅghike vihāre uparivehāsakuṭiyā āhaccapādakaṁ mañcaṁ vā pīṭhaṁ vā abhinisīdanto dve āpattiyo āpajjati. Abhinisīdati, payoge dukkaṭaṁ; abhinisinne āpatti pācittiyassa.
Dvattipariyāye adhiṭṭhahitvā tatuttari adhiṭṭhahanto dve āpattiyo āpajjati. Adhiṭṭheti, payoge dukkaṭaṁ; adhiṭṭhite āpatti pācittiyassa.
Jānaṁ sappāṇakaṁ udakaṁ tiṇaṁ vā mattikaṁ vā siñcanto dve āpattiyo āpajjati. Siñcati, payoge dukkaṭaṁ; siñcite āpatti pācittiyassa.
Bhūtagāmavaggo dutiyo.
5.3. Ovādavagga Asammato bhikkhuniyo ovadanto dve āpattiyo āpajjati. Ovadati, payoge dukkaṭaṁ; ovadite āpatti pācittiyassa.
Atthaṅgate sūriye bhikkhuniyo ovadanto dve āpattiyo āpajjati. Ovadati, payoge dukkaṭaṁ; ovadite āpatti pācittiyassa.
Bhikkhunupassayaṁ upasaṅkamitvā bhikkhuniyo ovadanto dve āpattiyo āpajjati. Ovadati, payoge dukkaṭaṁ; ovadite āpatti pācittiyassa.
“Āmisahetu bhikkhū bhikkhuniyo ovadantī”ti bhaṇanto dve āpattiyo āpajjati. Bhaṇati, payoge dukkaṭaṁ; bhaṇite āpatti pācittiyassa.
Aññātikāya bhikkhuniyā cīvaraṁ dento dve āpattiyo āpajjati. Deti, payoge dukkaṭaṁ; dinne āpatti pācittiyassa.
Aññātikāya bhikkhuniyā cīvaraṁ sibbento dve āpattiyo āpajjati. Sibbeti, payoge dukkaṭaṁ; ārāpathe ārāpathe āpatti pācittiyassa.
Bhikkhuniyā saddhiṁ saṁvidhāya ekaddhānamaggaṁ paṭipajjanto dve āpattiyo āpajjati. Paṭipajjati, payoge dukkaṭaṁ; paṭipanne āpatti pācittiyassa.
Bhikkhuniyā saddhiṁ saṁvidhāya ekaṁ nāvaṁ abhiruhanto dve āpattiyo āpajjati. Abhiruhati, payoge dukkaṭaṁ; abhiruḷhe āpatti pācittiyassa.
Jānaṁ bhikkhuniparipācitaṁ piṇḍapātaṁ bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Bhikkhuniyā saddhiṁ eko ekāya raho nisajjaṁ kappento dve āpattiyo āpajjati. Nisīdati, payoge dukkaṭaṁ; nisinne āpatti pācittiyassa.
Ovādavaggo tatiyo.
5.4. Bhojanavagga Tatuttari āvasathapiṇḍaṁ bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Gaṇabhojanaṁ bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Paramparabhojanaṁ bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Dvattipattapūre pūve paṭiggahetvā tatuttari paṭiggaṇhanto dve āpattiyo āpajjati. Gaṇhāti, payoge dukkaṭaṁ; gahite āpatti pācittiyassa.
Bhuttāvī pavārito anatirittaṁ khādanīyaṁ vā bhojanīyaṁ vā bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Bhikkhuṁ bhuttāviṁ pavāritaṁ anatirittena khādanīyena vā bhojanīyena vā abhihaṭṭhuṁ pavārento dve āpattiyo āpajjati. Tassa vacanena “khādissāmi bhuñjissāmī”ti paṭiggaṇhāti, āpatti dukkaṭassa; bhojanapariyosāne āpatti pācittiyassa.
Vikāle khādanīyaṁ vā bhojanīyaṁ vā bhuñjanto dve āpattiyo āpajjati. “Khādissāmi bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Sannidhikārakaṁ khādanīyaṁ vā bhojanīyaṁ vā bhuñjanto dve āpattiyo āpajjati. “Khādissāmi bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Paṇītabhojanāni attano atthāya viññāpetvā bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Adinnaṁ mukhadvāraṁ āhāraṁ āharanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Bhojanavaggo catuttho.
5.5. Acelakavagga Acelakassa vā paribbājakassa vā paribbājikāya vā sahatthā khādanīyaṁ vā bhojanīyaṁ vā dento dve āpattiyo āpajjati. Deti, payoge dukkaṭaṁ; dinne āpatti pācittiyassa.
Bhikkhuṁ—“ehāvuso, gāmaṁ vā nigamaṁ vā piṇḍāya pavisissāmā”ti tassa dāpetvā vā adāpetvā vā uyyojento dve āpattiyo āpajjati. Uyyojeti, payoge dukkaṭaṁ; uyyojite āpatti pācittiyassa.
Sabhojane kule anupakhajja nisajjaṁ kappento dve āpattiyo āpajjati. Nisīdati, payoge dukkaṭaṁ; nisinne āpatti pācittiyassa.
Mātugāmena saddhiṁ raho paṭicchanne āsane nisajjaṁ kappento dve āpattiyo āpajjati. Nisīdati, payoge dukkaṭaṁ; nisinne āpatti pācittiyassa.
Mātugāmena saddhiṁ eko ekāya raho nisajjaṁ kappento dve āpattiyo āpajjati. Nisīdati, payoge dukkaṭaṁ; nisinne āpatti pācittiyassa.
Nimantito sabhatto samāno purebhattaṁ pacchābhattaṁ kulesu cārittaṁ āpajjanto dve āpattiyo āpajjati. Paṭhamaṁ pādaṁ ummāraṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa.
Tatuttari bhesajjaṁ viññāpento dve āpattiyo āpajjati. Viññāpeti, payoge dukkaṭaṁ; viññāpite āpatti pācittiyassa.
Uyyuttaṁ senaṁ dassanāya gacchanto dve āpattiyo āpajjati. Gacchati, āpatti dukkaṭassa; yattha ṭhito passati, āpatti pācittiyassa.
Atirekatirattaṁ senāya vasanto dve āpattiyo āpajjati. Vasati, payoge dukkaṭaṁ; vasite āpatti pācittiyassa.
Uyyodhikaṁ gacchanto dve āpattiyo āpajjati. Gacchati, āpatti dukkaṭassa; yattha ṭhito passati, āpatti pācittiyassa.
Acelakavaggo pañcamo.
5.6. Surāmerayavagga Majjaṁ pivanto dve āpattiyo āpajjati. “Pivissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.
Bhikkhuṁ aṅgulipatodakena hāsento dve āpattiyo āpajjati. Hāseti, payoge dukkaṭaṁ; hasite āpatti pācittiyassa.
Udake kīḷanto dve āpattiyo āpajjati. Heṭṭhāgopphake udake kīḷati, āpatti dukkaṭassa; uparigopphake kīḷati, āpatti pācittiyassa.
Anādariyaṁ karonto dve āpattiyo āpajjati. Karoti, payoge dukkaṭaṁ; kate āpatti pācittiyassa.
Bhikkhuṁ bhiṁsāpento dve āpattiyo āpajjati. Bhiṁsāpeti, payoge dukkaṭaṁ; bhiṁsāpite āpatti pācittiyassa.
Jotiṁ samādahitvā visibbento dve āpattiyo āpajjati. Samādahati, payoge dukkaṭaṁ; samādahite āpatti pācittiyassa.
Orenaddhamāsaṁ nahāyanto dve āpattiyo āpajjati. Nahāyati, payoge dukkaṭaṁ; nahānapariyosāne āpatti pācittiyassa.
Anādiyitvā tiṇṇaṁ dubbaṇṇakaraṇānaṁ aññataraṁ dubbaṇṇakaraṇaṁ navaṁ cīvaraṁ paribhuñjanto dve āpattiyo āpajjati. Paribhuñjati, payoge dukkaṭaṁ; paribhutte āpatti pācittiyassa.
Bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṁ cīvaraṁ vikappetvā appaccuddhāraṇaṁ paribhuñjanto dve āpattiyo āpajjati. Paribhuñjati, payoge dukkaṭaṁ; paribhutte āpatti pācittiyassa.
Bhikkhussa pattaṁ vā cīvaraṁ vā nisīdanaṁ vā sūcigharaṁ vā kāyabandhanaṁ vā apanidhento dve āpattiyo āpajjati. Apanidheti, payoge dukkaṭaṁ; apanidhite āpatti pācittiyassa.
Surāmerayavaggo chaṭṭho.
5.7. Sappāṇakavagga Sañcicca pāṇaṁ jīvitā voropento kati āpattiyo āpajjati? Sañcicca pāṇaṁ jīvitā voropento catasso āpattiyo āpajjati. Anodissa opātaṁ khaṇati—“yo koci papatitvā marissatī”ti, āpatti dukkaṭassa; manusso tasmiṁ papatitvā marati, āpatti pārājikassa; yakkho vā peto vā tiracchānagatamanussaviggaho vā tasmiṁ papatitvā marati, āpatti thullaccayassa; tiracchānagato tasmiṁ papatitvā marati, āpatti pācittiyassa— sañcicca pāṇaṁ jīvitā voropento imā catasso āpattiyo āpajjati.
Jānaṁ sappāṇakaṁ udakaṁ paribhuñjanto dve āpattiyo āpajjati. Paribhuñjati, payoge dukkaṭaṁ; paribhutte āpatti pācittiyassa.
Jānaṁ yathādhammaṁ nihatādhikaraṇaṁ punakammāya ukkoṭento dve āpattiyo āpajjati. Ukkoṭeti, payoge dukkaṭaṁ; ukkoṭite āpatti pācittiyassa.
Bhikkhussa jānaṁ duṭṭhullaṁ āpattiṁ paṭicchādento ekaṁ āpattiṁ āpajjati, pācittiyaṁ.
Jānaṁ ūnavīsativassaṁ puggalaṁ upasampādento dve āpattiyo āpajjati. Upasampādeti, payoge dukkaṭaṁ; upasampādite āpatti pācittiyassa.
Jānaṁ theyyasatthena saddhiṁ saṁvidhāya ekaddhānamaggaṁ paṭipajjanto dve āpattiyo āpajjati. Paṭipajjati, payoge dukkaṭaṁ; paṭipanne āpatti pācittiyassa.
Mātugāmena saddhiṁ saṁvidhāya ekaddhānamaggaṁ paṭipajjanto dve āpattiyo āpajjati. Paṭipajjati, payoge dukkaṭaṁ; paṭipanne āpatti pācittiyassa.
Pāpikāya diṭṭhiyā yāvatatiyaṁ samanubhāsanāya na paṭinissajjanto dve āpattiyo āpajjati. Ñattiyā dukkaṭaṁ; kammavācāpariyosāne āpatti pācittiyassa.
Jānaṁ tathāvādinā bhikkhunā akaṭānudhammena taṁ diṭṭhiṁ appaṭinissaṭṭhena saddhiṁ sambhuñjanto dve āpattiyo āpajjati. Sambhuñjati, payoge dukkaṭaṁ; sambhutte āpatti pācittiyassa.
Jānaṁ tathānāsitaṁ samaṇuddesaṁ upalāpento dve āpattiyo āpajjati. Upalāpeti, payoge dukkaṭaṁ; upalāpite āpatti pācittiyassa.
Sappāṇakavaggo sattamo.
5.8. Sahadhammikavagga Bhikkhūhi sahadhammikaṁ vuccamāno—“na tāvāhaṁ, āvuso, etasmiṁ sikkhāpade sikkhissāmi yāva na aññaṁ bhikkhuṁ byattaṁ vinayadharaṁ paripucchissāmī”ti bhaṇanto dve āpattiyo āpajjati. Bhaṇati, payoge dukkaṭaṁ; bhaṇite āpatti pācittiyassa.
Vinayaṁ vivaṇṇento dve āpattiyo āpajjati. Vivaṇṇeti, payoge dukkaṭaṁ; vivaṇṇite āpatti pācittiyassa.
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
Bhikkhussa kupito anattamano pahāraṁ dento dve āpattiyo āpajjati. Paharati, payoge dukkaṭaṁ; pahate āpatti pācittiyassa.
Bhikkhussa kupito anattamano talasattikaṁ uggiranto dve āpattiyo āpajjati. Uggirati, payoge dukkaṭaṁ; uggirite āpatti pācittiyassa.
Bhikkhuṁ amūlakena saṅghādisesena anuddhaṁsento dve āpattiyo āpajjati. Anuddhaṁseti, payoge dukkaṭaṁ; anuddhaṁsite āpatti pācittiyassa.
Bhikkhussa sañcicca kukkuccaṁ upadahanto dve āpattiyo āpajjati. Upadahati, payoge dukkaṭaṁ; upadahite āpatti pācittiyassa.
Bhikkhūnaṁ bhaṇḍanajātānaṁ kalahajātānaṁ vivādāpannānaṁ upassutiṁ tiṭṭhanto dve āpattiyo āpajjati. “Sossāmī”ti gacchati, āpatti dukkaṭassa; yattha ṭhito suṇāti, āpatti pācittiyassa.
Dhammikānaṁ kammānaṁ chandaṁ datvā pacchā khīyanadhammaṁ āpajjanto dve āpattiyo āpajjati. Khiyyati, payoge dukkaṭaṁ; khiyyite āpatti pācittiyassa.
Saṅghe vinicchayakathāya vattamānāya chandaṁ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṁ vijahantassa āpatti dukkaṭassa; vijahite āpatti pācittiyassa.
Samaggena saṅghena cīvaraṁ datvā pacchā khīyanadhammaṁ āpajjanto dve āpattiyo āpajjati. Khiyyati, payoge dukkaṭaṁ; khiyyite āpatti pācittiyassa.
Jānaṁ saṅghikaṁ lābhaṁ pariṇataṁ puggalassa pariṇāmento dve āpattiyo āpajjati. Pariṇāmeti, payoge dukkaṭaṁ; pariṇāmite āpatti pācittiyassa.
Sahadhammikavaggo aṭṭhamo.
5.9. Rājavagga Pubbe appaṭisaṁvidito rañño antepuraṁ pavisanto dve āpattiyo āpajjati. Paṭhamaṁ pādaṁ ummāraṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa.
Ratanaṁ uggaṇhanto dve āpattiyo āpajjati. Gaṇhāti, payoge dukkaṭaṁ; gahite āpatti pācittiyassa.
Santaṁ bhikkhuṁ anāpucchā vikāle gāmaṁ pavisanto dve āpattiyo āpajjati. Paṭhamaṁ pādaṁ parikkhepaṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa.
Aṭṭhimayaṁ vā dantamayaṁ vā visāṇamayaṁ vā sūcigharaṁ kārāpento dve āpattiyo āpajjati. Kārāpeti, payoge dukkaṭaṁ; kārāpite āpatti pācittiyassa.
Pamāṇātikkantaṁ mañcaṁ vā pīṭhaṁ vā kārāpento dve āpattiyo āpajjati. Kārāpeti, payoge dukkaṭaṁ; kārāpite āpatti pācittiyassa.
Mañcaṁ vā pīṭhaṁ vā tūlonaddhaṁ kārāpento dve āpattiyo āpajjati. Kārāpeti, payoge dukkaṭaṁ; kārāpite āpatti pācittiyassa.
Pamāṇātikkantaṁ nisīdanaṁ kārāpento dve āpattiyo āpajjati. Kārāpeti, payoge dukkaṭaṁ; kārāpite āpatti pācittiyassa.
Pamāṇātikkantaṁ kaṇḍuppaṭicchādiṁ kārāpento dve āpattiyo āpajjati. Kārāpeti, payoge dukkaṭaṁ; kārāpite āpatti pācittiyassa.
Pamāṇātikkantaṁ vassikasāṭikaṁ kārāpento dve āpattiyo āpajjati. Kārāpeti, payoge dukkaṭaṁ; kārāpite āpatti pācittiyassa.
Sugatacīvarappamāṇaṁ cīvaraṁ kārāpento kati āpattiyo āpajjati? Sugatacīvarappamāṇaṁ cīvaraṁ kārāpento dve āpattiyo āpajjati. Kārāpeti, payoge dukkaṭaṁ; kārāpite āpatti pācittiyassa— sugatacīvarappamāṇaṁ cīvaraṁ kārāpento imā dve āpattiyo āpajjati.
Rājavaggo navamo. Khuddakā niṭṭhitā.
6. Pāṭidesanīyakaṇḍa Aññātikāya bhikkhuniyā antaragharaṁ paviṭṭhāya hatthato khādanīyaṁ vā bhojanīyaṁ vā sahatthā paṭiggahetvā bhuñjanto kati āpattiyo āpajjati? Aññātikāya bhikkhuniyā antaragharaṁ paviṭṭhāya hatthato khādanīyaṁ vā bhojanīyaṁ vā sahatthā paṭiggahetvā bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa— aññātikāya bhikkhuniyā antaragharaṁ paviṭṭhāya hatthato khādanīyaṁ vā bhojanīyaṁ vā sahatthā paṭiggahetvā bhuñjanto imā dve āpattiyo āpajjati.
Bhikkhuniyā vosāsantiyā na nivāretvā bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa.
Sekkhasammatesu kulesu khādanīyaṁ vā bhojanīyaṁ vā sahatthā paṭiggahetvā bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa.
Āraññakesu senāsanesu pubbe appaṭisaṁviditaṁ khādanīyaṁ vā bhojanīyaṁ vā ajjhārāme sahatthā paṭiggahetvā bhuñjanto kati āpattiyo āpajjati? Āraññakesu senāsanesu pubbe appaṭisaṁviditaṁ khādanīyaṁ vā bhojanīyaṁ vā ajjhārāme sahatthā paṭiggahetvā bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa— āraññakesu senāsanesu pubbe appaṭisaṁviditaṁ khādanīyaṁ vā bhojanīyaṁ vā ajjhārāme sahatthā paṭiggahetvā bhuñjanto imā dve āpattiyo āpajjati.
Cattāro pāṭidesanīyā niṭṭhitā.
7. Sekhiyakaṇḍa 7.1. Parimaṇḍalavagga Anādariyaṁ paṭicca purato vā pacchato vā olambento nivāsento kati āpattiyo āpajjati? Anādariyaṁ paṭicca purato vā pacchato vā olambento nivāsento ekaṁ āpattiṁ āpajjati. Dukkaṭaṁ— anādariyaṁ paṭicca purato vā pacchato vā olambento nivāsento imaṁ ekaṁ āpattiṁ āpajjati.
Anādariyaṁ paṭicca purato vā pacchato vā olambento pārupanto ekaṁ āpattiṁ āpajjati. Dukkaṭaṁ.
Anādariyaṁ paṭicca kāyaṁ vivaritvā antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca kāyaṁ vivaritvā antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca hatthaṁ vā pādaṁ vā kīḷāpento antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca hatthaṁ vā pādaṁ vā kīḷāpento antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca tahaṁ tahaṁ olokento antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca tahaṁ tahaṁ olokento antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca ukkhittakāya antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca ukkhittakāya antaraghare nisīdanto ekaṁ āpattiṁ āpajjati. Dukkaṭaṁ.
Parimaṇḍalavaggo paṭhamo.
7.2. Ujjagghikavagga Anādariyaṁ paṭicca ujjagghikāya antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca ujjagghikāya antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca uccāsaddaṁ mahāsaddaṁ karonto antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca uccāsaddaṁ mahāsaddaṁ karonto antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca kāyappacālakaṁ antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca kāyappacālakaṁ antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca bāhuppacālakaṁ antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca bāhuppacālakaṁ antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca sīsappacālakaṁ antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca sīsappacālakaṁ antaraghare nisīdanto ekaṁ āpattiṁ āpajjati. Dukkaṭaṁ.
Ujjagghikavaggo dutiyo.
7.3. Khambhakatavagga Anādariyaṁ paṭicca khambhakato antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca khambhakato antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca oguṇṭhito antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca oguṇṭhito antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca ukkuṭikāya antaraghare gacchanto ekaṁ āpattiṁ āpajjati. Dukkaṭaṁ.
Anādariyaṁ paṭicca pallatthikāya antaraghare nisīdanto ekaṁ āpattiṁ āpajjati. Dukkaṭaṁ.
Anādariyaṁ paṭicca asakkaccaṁ piṇḍapātaṁ paṭiggaṇhanto ekaṁ āpattiṁ āpajjati. Dukkaṭaṁ.
Anādariyaṁ paṭicca tahaṁ tahaṁ olokento piṇḍapātaṁ paṭiggaṇhanto ekaṁ āpattiṁ āpajjati. Dukkaṭaṁ.
Anādariyaṁ paṭicca sūpaññeva bahuṁ paṭiggaṇhanto ekaṁ āpattiṁ āpajjati. Dukkaṭaṁ.
Anādariyaṁ paṭicca thūpīkataṁ piṇḍapātaṁ paṭiggaṇhanto ekaṁ āpattiṁ āpajjati. Dukkaṭaṁ.
Khambhakatavaggo tatiyo.
7.4. Piṇḍapātavagga Anādariyaṁ paṭicca asakkaccaṁ piṇḍapātaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca tahaṁ tahaṁ olokento piṇḍapātaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca tahaṁ tahaṁ omasitvā piṇḍapātaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca sūpaññeva bahuṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca thūpakato omadditvā piṇḍapātaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca sūpaṁ vā byañjanaṁ vā odanena paṭicchādento ekaṁ āpattiṁ āpajjati. Dukkaṭaṁ.
Anādariyaṁ paṭicca sūpaṁ vā odanaṁ vā agilāno attano atthāya viññāpetvā bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca ujjhānasaññī paresaṁ pattaṁ olokento ekaṁ āpattiṁ āpajjati. Dukkaṭaṁ.
Anādariyaṁ paṭicca mahantaṁ kabaḷaṁ karonto ekaṁ āpattiṁ āpajjati. Dukkaṭaṁ.
Anādariyaṁ paṭicca dīghaṁ ālopaṁ karonto ekaṁ āpattiṁ āpajjati. Dukkaṭaṁ.
Piṇḍapātavaggo catuttho.
7.5. Kabaḷavagga Anādariyaṁ paṭicca anāhaṭe kabaḷe mukhadvāraṁ vivaranto ekaṁ āpattiṁ āpajjati. Dukkaṭaṁ.
Anādariyaṁ paṭicca bhuñjamāno sabbaṁ hatthaṁ mukhe pakkhipanto ekaṁ āpattiṁ āpajjati. Dukkaṭaṁ.
Anādariyaṁ paṭicca sakabaḷena mukhena byāharanto ekaṁ āpattiṁ āpajjati. Dukkaṭaṁ.
Anādariyaṁ paṭicca piṇḍukkhepakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca kabaḷāvacchedakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca avagaṇḍakārakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca hatthaniddhunakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca sitthāvakārakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca jivhānicchārakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca capucapukārakaṁ bhuñjanto ekaṁ āpattiṁ āpajjati. Dukkaṭaṁ.
Kabaḷavaggo pañcamo.
7.6. Surusuruvagga Anādariyaṁ paṭicca surusurukārakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca hatthanillehakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca pattanillehakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca oṭṭhanillehakaṁ bhuñjanto ekaṁ āpattiṁ āpajjati. Dukkaṭaṁ.
Anādariyaṁ paṭicca sāmisena hatthena pānīyathālakaṁ paṭiggaṇhanto ekaṁ āpattiṁ āpajjati. Dukkaṭaṁ.
Anādariyaṁ paṭicca sasitthakaṁ pattadhovanaṁ antaraghare chaḍḍento ekaṁ āpattiṁ āpajjati. Dukkaṭaṁ.
Anādariyaṁ paṭicca chattapāṇissa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca daṇḍapāṇissa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca satthapāṇissa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca āvudhapāṇissa dhammaṁ desento ekaṁ āpattiṁ āpajjati. Dukkaṭaṁ.
Surusuruvaggo chaṭṭho.
7.7. Pādukavagga Anādariyaṁ paṭicca pādukāruḷhassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca upāhanāruḷhassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca yānagatassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca sayanagatassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca pallatthikāya nisinnassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca veṭhitasīsassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca oguṇṭhitasīsassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca chamāyaṁ nisīditvā āsane nisinnassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca nīce āsane nisīditvā ucce āsane nisinnassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca ṭhito nisinnassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca pacchato gacchanto purato gacchantassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca uppathena gacchanto pathena gacchantassa dhammaṁ desento ekaṁ āpattiṁ āpajjati. Dukkaṭaṁ.
Anādariyaṁ paṭicca ṭhito uccāraṁ vā passāvaṁ vā karonto ekaṁ āpattiṁ āpajjati. Dukkaṭaṁ.
Anādariyaṁ paṭicca harite uccāraṁ vā passāvaṁ vā kheḷaṁ vā karonto ekaṁ āpattiṁ āpajjati. Dukkaṭaṁ.
Anādariyaṁ paṭicca udake uccāraṁ vā passāvaṁ vā kheḷaṁ vā karonto kati āpattiyo āpajjati? Anādariyaṁ paṭicca udake uccāraṁ vā passāvaṁ vā kheḷaṁ vā karonto ekaṁ āpattiṁ āpajjati. Dukkaṭaṁ— anādariyaṁ paṭicca udake uccāraṁ vā passāvaṁ vā kheḷaṁ vā karonto imaṁ ekaṁ āpattiṁ āpajjati.
Pādukavaggo sattamo. Sekhiyā niṭṭhitā. Katāpattivāro niṭṭhito dutiyo.