Saṁyutta Nikāya 1.41 5. Ādittavagga

id: sn1.41 VRI: vol 23 สยามรัฐ: vol 15 25 segments

Saṁyutta Nikāya 1.41 5. Ādittavagga Ādittasutta

Evaṁ me sutaṁ— sya:15.43 ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhitā kho sā devatā bhagavato santike imā gāthāyo abhāsi:

“Ādittasmiṁ agārasmiṁ, yaṁ nīharati bhājanaṁ; Taṁ tassa hoti atthāya, no ca yaṁ tattha ḍayhati.

Evaṁ ādittako loko, jarāya maraṇena ca; Nīharetheva dānena, dinnaṁ hoti sunīhataṁ.

Dinnaṁ sukhaphalaṁ hoti, vri:23.36 nādinnaṁ hoti taṁ tathā; Corā haranti rājāno, aggi ḍahati nassati.

Atha antena jahati, sya:15.44 Sarīraṁ sapariggahaṁ; Etadaññāya medhāvī, Bhuñjetha ca dadetha ca; Datvā ca bhutvā ca yathānubhāvaṁ, Anindito saggamupeti ṭhānan”ti.