Saṁyutta Nikāya 1.49 5. Ādittavagga
id: sn1.49 VRI: vol 23 สยามรัฐ: vol 15 49 segments
Saṁyutta Nikāya 1.49 5. Ādittavagga Maccharisutta
“Yedha maccharino loke, vri:23.39 kadariyā paribhāsakā; Aññesaṁ dadamānānaṁ, antarāyakarā narā.
Kīdiso tesaṁ vipāko, sya:15.47 samparāyo ca kīdiso; Bhagavantaṁ puṭṭhumāgamma, kathaṁ jānemu taṁ mayan”ti.
“Yedha maccharino loke, kadariyā paribhāsakā; Aññesaṁ dadamānānaṁ, antarāyakarā narā.
Nirayaṁ tiracchānayoniṁ, yamalokaṁ upapajjare; Sace enti manussattaṁ, dalidde jāyare kule.
Coḷaṁ piṇḍo ratī khiḍḍā, yattha kicchena labbhati; Parato āsīsare bālā, tampi tesaṁ na labbhati; Diṭṭhe dhammesa vipāko, samparāye ca duggatī”ti.
“Itihetaṁ vijānāma, aññaṁ pucchāma gotama; Yedha laddhā manussattaṁ, vadaññū vītamaccharā.
Buddhe pasannā dhamme ca, saṅghe ca tibbagāravā; Kīdiso tesaṁ vipāko, samparāyo ca kīdiso; Bhagavantaṁ puṭṭhumāgamma, kathaṁ jānemu taṁ mayan”ti.
“Yedha laddhā manussattaṁ, vadaññū vītamaccharā; Buddhe pasannā dhamme ca, saṅghe ca tibbagāravā; Ete saggā pakāsanti, yattha te upapajjare.
Sace enti manussattaṁ, vri:23.40 aḍḍhe ājāyare kule; Coḷaṁ piṇḍo ratī khiḍḍā, yatthākicchena labbhati.
Parasambhatesu bhogesu, sya:15.48 vasavattīva modare; Diṭṭhe dhammesa vipāko, samparāye ca suggatī”ti.