Saṁyutta Nikāya 1.9 1. Naḷavagga
id: sn1.9 13 segments
Saṁyutta Nikāya 1.9 1. Naḷavagga Mānakāmasutta
Sāvatthinidānaṁ. Ekamantaṁ ṭhitā kho sā devatā bhagavato santike imaṁ gāthaṁ abhāsi:
“Na mānakāmassa damo idhatthi, Na monamatthi asamāhitassa; Eko araññe viharaṁ pamatto, Na maccudheyyassa tareyya pāran”ti.
“Mānaṁ pahāya susamāhitatto, Sucetaso sabbadhi vippamutto; Eko araññe viharaṁ appamatto, Sa maccudheyyassa tareyya pāran”ti.