Saṁyutta Nikāya 11.21 3. Tatiyavagga
id: sn11.21 สยามรัฐ: vol 15 16 segments
Saṁyutta Nikāya 11.21 3. Tatiyavagga Chetvāsutta
Sāvatthiyaṁ jetavane. sya:15.348 Atha kho sakko devānamindo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho sakko devānamindo bhagavantaṁ gāthāya ajjhabhāsi:
“Kiṁsu chetvā sukhaṁ seti, kiṁsu chetvā na socati; Kissassu ekadhammassa, vadhaṁ rocesi gotamā”ti.
“Kodhaṁ chetvā sukhaṁ seti, kodhaṁ chetvā na socati; Kodhassa visamūlassa, madhuraggassa vāsava; Vadhaṁ ariyā pasaṁsanti, tañhi chetvā na socatī”ti.