Saṁyutta Nikāya 11.8 1. Paṭhamavagga
id: sn11.8 VRI: vol 23 สยามรัฐ: vol 15 27 segments
Saṁyutta Nikāya 11.8 1. Paṭhamavagga Verocanaasurindasutta
Sāvatthiyaṁ jetavane. Tena kho pana samayena bhagavā divāvihāragato hoti paṭisallīno. Atha kho sakko ca devānamindo verocano ca asurindo yena bhagavā tenupasaṅkamiṁsu; upasaṅkamitvā paccekaṁ dvārabāhaṁ nissāya aṭṭhaṁsu. Atha kho verocano asurindo bhagavato santike imaṁ gāthaṁ abhāsi:
“Vāyametheva puriso, vri:23.261 yāva atthassa nipphadā; Nipphannasobhano attho, verocanavaco idan”ti.
“Vāyametheva puriso, yāva atthassa nipphadā; Nipphannasobhano attho, khantyā bhiyyo na vijjatī”ti.
“Sabbe sattā atthajātā, sya:15.331 tattha tattha yathārahaṁ; Saṁyogaparamā tveva, sambhogā sabbapāṇinaṁ; Nipphannasobhano attho, verocanavaco idan”ti.
“Sabbe sattā atthajātā, tattha tattha yathārahaṁ; Saṁyogaparamā tveva, sambhogā sabbapāṇinaṁ; Nipphannasobhano attho, khantyā bhiyyo na vijjatī”ti.