Saṁyutta Nikāya 2.8 1. Paṭhamavagga
id: sn2.8 VRI: vol 23 สยามรัฐ: vol 15 56 segments
Saṁyutta Nikāya 2.8 1. Paṭhamavagga Tāyanasutta
Sāvatthinidānaṁ. Atha kho tāyano devaputto purāṇatitthakaro abhikkantāya rattiyā abhikkantavaṇṇo kevalakappaṁ jetavanaṁ obhāsetvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ aṭṭhāsi. Ekamantaṁ ṭhito kho tāyano devaputto bhagavato santike imā gāthāyo abhāsi:
“Chinda sotaṁ parakkamma, kāme panuda brāhmaṇa; Nappahāya munī kāme, nekattamupapajjati.
Kayirā ce kayirāthenaṁ, daḷhamenaṁ parakkame; Sithilo hi paribbājo, bhiyyo ākirate rajaṁ.
Akataṁ dukkaṭaṁ seyyo, sya:15.68 pacchā tapati dukkaṭaṁ; Katañca sukataṁ seyyo, yaṁ katvā nānutappati.
Kuso yathā duggahito, vri:23.59 hatthamevānukantati; Sāmaññaṁ dupparāmaṭṭhaṁ, nirayāyūpakaḍḍhati.
Yaṁ kiñci sithilaṁ kammaṁ, saṅkiliṭṭhañca yaṁ vataṁ; Saṅkassaraṁ brahmacariyaṁ, na taṁ hoti mahapphalan”ti.
Idamavoca tāyano devaputto; idaṁ vatvā bhagavantaṁ abhivādetvā padakkhiṇaṁ katvā tatthevantaradhāyīti.
Atha kho bhagavā tassā rattiyā accayena bhikkhū āmantesi: “imaṁ, bhikkhave, rattiṁ tāyano nāma devaputto purāṇatitthakaro abhikkantāya rattiyā abhikkantavaṇṇo kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhito kho, bhikkhave, tāyano devaputto mama santike imā gāthāyo abhāsi:
‘Chinda sotaṁ parakkamma, kāme panuda brāhmaṇa; Nappahāya munī kāme, nekattamupapajjati.
Kayirā ce kayirāthenaṁ, daḷhamenaṁ parakkame; Sithilo hi paribbājo, bhiyyo ākirate rajaṁ.
Akataṁ dukkaṭaṁ seyyo, pacchā tapati dukkaṭaṁ; Katañca sukataṁ seyyo, yaṁ katvā nānutappati.
Kuso yathā duggahito, sya:15.69 hatthamevānukantati; Sāmaññaṁ dupparāmaṭṭhaṁ, nirayāyūpakaḍḍhati.
Yaṁ kiñci sithilaṁ kammaṁ, vri:23.60 saṅkiliṭṭhañca yaṁ vataṁ; Saṅkassaraṁ brahmacariyaṁ, na taṁ hoti mahapphalan’ti.
Idamavoca, bhikkhave, tāyano devaputto, idaṁ vatvā maṁ abhivādetvā padakkhiṇaṁ katvā tatthevantaradhāyi. Uggaṇhātha, bhikkhave, tāyanagāthā; pariyāpuṇātha, bhikkhave, tāyanagāthā; dhāretha, bhikkhave, tāyanagāthā. Atthasaṁhitā, bhikkhave, tāyanagāthā ādibrahmacariyikā”ti.