← sn

Saṁyutta Nikāya 21.12 1. Bhikkhuvagga

id: sn21.12 VRI: vol 24 สยามรัฐ: vol 16 40 segments
Saṁyutta Nikāya 21.12 1. Bhikkhuvagga Sahāyakasutta
Sāvatthiyaṁ viharati. Atha kho dve bhikkhū sahāyakā āyasmato mahākappinassa saddhivihārino yena bhagavā tenupasaṅkamiṁsu. Addasā kho bhagavā te bhikkhū dūratova āgacchante. Disvāna bhikkhū āmantesi: “passatha no tumhe, bhikkhave, ete bhikkhū sahāyake āgacchante kappinassa saddhivihārino”ti? “Evaṁ, bhante”. “Ete kho te bhikkhū mahiddhikā mahānubhāvā. Na ca sā samāpatti sulabharūpā, yā tehi bhikkhūhi asamāpannapubbā. Yassa catthāya kulaputtā sammadeva agārasmā anagāriyaṁ pabbajanti tadanuttaraṁ brahmacariyapariyosānaṁ diṭṭheva dhamme sayaṁ abhiññā sacchikatvā upasampajja viharantī”ti.
Idamavoca bhagavā. Idaṁ vatvāna sugato athāparaṁ etadavoca satthā:
“Sahāyāvatime bhikkhū, cirarattaṁ sametikā; Sameti nesaṁ saddhammo, dhamme buddhappavedite.
Suvinītā kappinena, dhamme ariyappavedite; Dhārenti antimaṁ dehaṁ, jetvā māraṁ savāhinin”ti. Dvādasamaṁ. Bhikkhuvaggo paṭhamo.
Tassuddānaṁ Kolito upatisso ca, ghaṭo cāpi pavuccati; Navo sujāto bhaddi ca, visākho nando tisso ca; Theranāmo ca kappino, sahāyena ca dvādasāti. Bhikkhusaṁyuttaṁ samattaṁ. Nidānavaggo dutiyo.
Tassuddānaṁ Nidānābhisamayadhātu, anamataggena kassapaṁ; Sakkārarāhulalakkhaṇo, opammabhikkhunā vaggo. Dutiyo tena pavuccatīti. Nidānavaggasaṁyuttapāḷi niṭṭhitā.