Saṁyutta Nikāya 22.113 12. Dhammakathikavagga
id: sn22.113 VRI: vol 25 สยามรัฐ: vol 17 17 segments
Saṁyutta Nikāya 22.113 12. Dhammakathikavagga Avijjāsutta
Sāvatthinidānaṁ. vri:25.146 · sya:17.198 Atha kho aññataro bhikkhu yena bhagavā tenupasaṅkami …pe… ekamantaṁ nisinno kho so bhikkhu bhagavantaṁ etadavoca: “‘avijjā, avijjā’ti, bhante, vuccati. Katamā nu kho, bhante, avijjā; kittāvatā ca avijjāgato hotī”ti? “Idha, bhikkhu, assutavā puthujjano rūpaṁ nappajānāti, rūpasamudayaṁ nappajānāti, rūpanirodhaṁ nappajānāti, rūpanirodhagāminiṁ paṭipadaṁ nappajānāti; vedanaṁ nappajānāti … saññaṁ … saṅkhāre nappajānāti …pe… viññāṇanirodhagāminiṁ paṭipadaṁ nappajānāti. Ayaṁ vuccati, bhikkhu, avijjā; ettāvatā ca avijjāgato hotī”ti. Paṭhamaṁ.