Saṁyutta Nikāya 22.156 15. Diṭṭhivagga

id: sn22.156 VRI: vol 25 28 segments

Saṁyutta Nikāya 22.156 15. Diṭṭhivagga Attānudiṭṭhisutta

Sāvatthinidānaṁ. vri:25.171 “Kismiṁ nu kho, bhikkhave, sati, kiṁ upādāya, kiṁ abhinivissa attānudiṭṭhi uppajjatī”ti? Bhagavaṁmūlakā no, bhante, dhammā …pe… “rūpe kho, bhikkhave, sati, rūpaṁ upādāya, rūpaṁ abhinivissa attānudiṭṭhi uppajjati. Vedanāya sati … saññāya sati … saṅkhāresu sati … viññāṇe sati, viññāṇaṁ upādāya, viññāṇaṁ abhinivissa attānudiṭṭhi uppajjati. Taṁ kiṁ maññatha, bhikkhave, rūpaṁ niccaṁ vā aniccaṁ vā”ti? “Aniccaṁ, bhante”. “Yaṁ panāniccaṁ …pe… api nu taṁ anupādāya attānudiṭṭhi uppajjeyyā”ti? “No hetaṁ, bhante”. “Vedanā … saññā … saṅkhārā … viññāṇaṁ niccaṁ vā aniccaṁ vā”ti? “Aniccaṁ, bhante”. “Yaṁ panāniccaṁ …pe… api nu taṁ anupādāya attānudiṭṭhi uppajjeyyā”ti? “No hetaṁ, bhante”. “Evaṁ passaṁ …pe… nāparaṁ itthattāyāti pajānātī”ti. Sattamaṁ.