Saṁyutta Nikāya 3.17 2. Dutiyavagga
id: sn3.17 VRI: vol 23 สยามรัฐ: vol 15 30 segments
Saṁyutta Nikāya 3.17 2. Dutiyavagga Appamādasutta
Sāvatthinidānaṁ. Ekamantaṁ nisīdi. Ekamantaṁ nisinno kho rājā pasenadi kosalo bhagavantaṁ etadavoca: “atthi nu kho, bhante, eko dhammo yo ubho atthe samadhiggayha tiṭṭhati— diṭṭhadhammikañceva atthaṁ samparāyikañcā”ti?
“Atthi kho, mahārāja, eko dhammo yo ubho atthe samadhiggayha tiṭṭhati— diṭṭhadhammikañceva atthaṁ samparāyikañcā”ti.
“Katamo pana, bhante, eko dhammo, yo ubho atthe samadhiggayha tiṭṭhati— sya:15.126 diṭṭhadhammikañceva atthaṁ samparāyikañcā”ti?
“Appamādo kho, mahārāja, eko dhammo, yo ubho atthe samadhiggayha tiṭṭhati— diṭṭhadhammikañceva atthaṁ samparāyikañcāti. Seyyathāpi, mahārāja, yāni kānici jaṅgalānaṁ pāṇānaṁ padajātāni, sabbāni tāni hatthipade samodhānaṁ gacchanti, hatthipadaṁ tesaṁ aggamakkhāyati—yadidaṁ mahantattena; evameva kho, mahārāja, appamādo eko dhammo, yo ubho atthe samadhiggayha tiṭṭhati— diṭṭhadhammikañceva atthaṁ samparāyikañcā”ti. Idamavoca …pe…
“Āyuṁ arogiyaṁ vaṇṇaṁ, saggaṁ uccākulīnataṁ; Ratiyo patthayantena, uḷārā aparāparā.
Appamādaṁ pasaṁsanti, puññakiriyāsu paṇḍitā; Appamatto ubho atthe, adhiggaṇhāti paṇḍito.
Diṭṭhe dhamme ca yo attho, vri:23.105 yo cattho samparāyiko; Atthābhisamayā dhīro, paṇḍitoti pavuccatī”ti.