Saṁyutta Nikāya 35.122 12. Lokakāmaguṇavagga
id: sn35.122 สยามรัฐ: vol 18 14 segments
Saṁyutta Nikāya 35.122 12. Lokakāmaguṇavagga Saṁyojaniyadhammasutta
“Saṁyojaniye ca, bhikkhave, dhamme desessāmi saṁyojanañca. sya:18.136 Taṁ suṇātha. Katame ca, bhikkhave, saṁyojaniyā dhammā, katamañca saṁyojanaṁ? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā. Ime vuccanti, bhikkhave, saṁyojaniyā dhammā. Yo tattha chandarāgo, taṁ tattha saṁyojanaṁ …pe… santi, bhikkhave, jivhāviññeyyā rasā …pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṁhitā rajanīyā. Ime vuccanti, bhikkhave, saṁyojaniyā dhammā. Yo tattha chandarāgo taṁ tattha saṁyojanan”ti. Navamaṁ.