Saṁyutta Nikāya 4.10 1. Paṭhamavagga
id: sn4.10 VRI: vol 23 สยามรัฐ: vol 15 26 segments
Saṁyutta Nikāya 4.10 1. Paṭhamavagga Dutiyaāyusutta
Evaṁ me sutaṁ— vri:23.129 ekaṁ samayaṁ bhagavā rājagahe viharati veḷuvane kalandakanivāpe. Tatra kho bhagavā …pe… etadavoca:
“Appamidaṁ, bhikkhave, manussānaṁ āyu. Gamanīyo samparāyo, kattabbaṁ kusalaṁ, caritabbaṁ brahmacariyaṁ. Natthi jātassa amaraṇaṁ. Yo, bhikkhave, ciraṁ jīvati, so vassasataṁ appaṁ vā bhiyyo”ti.
Atha kho māro pāpimā yena bhagavā tenupasaṅkami; upasaṅkamitvā bhagavantaṁ gāthāya ajjhabhāsi: sya:15.159
“Nāccayanti ahorattā, Jīvitaṁ nūparujjhati; Āyu anupariyāyati maccānaṁ, Nemīva rathakubbaran”ti.
“Accayanti ahorattā, jīvitaṁ uparujjhati; Āyu khīyati maccānaṁ, kunnadīnaṁva odakan”ti.
Atha kho māro pāpimā “jānāti maṁ bhagavā, jānāti maṁ sugato”ti dukkhī dummano tatthevantaradhāyīti. Paṭhamo vaggo.
Tassuddānaṁ Tapokammañca nāgo ca, subhaṁ pāsena te duve; Sappo supati nandanaṁ, āyunā apare duveti.