Saṁyutta Nikāya 4.4 1. Paṭhamavagga

id: sn4.4 สยามรัฐ: vol 15 21 segments

Saṁyutta Nikāya 4.4 1. Paṭhamavagga Paṭhamamārapāsasutta

Evaṁ me sutaṁ— sya:15.153 ekaṁ samayaṁ bhagavā bārāṇasiyaṁ viharati isipatane migadāye. Tatra kho bhagavā bhikkhū āmantesi: “bhikkhavo”ti. “Bhadante”ti te bhikkhū bhagavato paccassosuṁ. Bhagavā etadavoca:

“Mayhaṁ kho, bhikkhave, yoniso manasikārā yoniso sammappadhānā anuttarā vimutti anuppattā, anuttarā vimutti sacchikatā. Tumhepi, bhikkhave, yoniso manasikārā yoniso sammappadhānā anuttaraṁ vimuttiṁ anupāpuṇātha, anuttaraṁ vimuttiṁ sacchikarothā”ti. Atha kho māro pāpimā yena bhagavā tenupasaṅkami; upasaṅkamitvā bhagavantaṁ gāthāya ajjhabhāsi:

“Baddhosi mārapāsena, ye dibbā ye ca mānusā; Mārabandhanabaddhosi, na me samaṇa mokkhasī”ti.

“Muttāhaṁ mārapāsena, Ye dibbā ye ca mānusā; Mārabandhanamuttomhi, Nihato tvamasi antakā”ti.

Atha kho māro pāpimā …pe… tatthevantaradhāyīti.