Saṁyutta Nikāya 51.27 3. Ayoguḷavagga
id: sn51.27 VRI: vol 27 สยามรัฐ: vol 19 22 segments
Saṁyutta Nikāya 51.27 3. Ayoguḷavagga Paṭhamaānandasutta
Sāvatthinidānaṁ. sya:19.367 Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:
“Katamā nu kho, bhante, iddhi, katamo iddhipādo, katamā iddhipādabhāvanā, katamā iddhipādabhāvanāgāminī paṭipadā”ti? “Idhānanda, bhikkhu anekavihitaṁ iddhividhaṁ paccanubhoti—ekopi hutvā bahudhā hoti, bahudhāpi hutvā eko hoti …pe… yāva brahmalokāpi kāyena vasaṁ vatteti— ayaṁ vuccatānanda, iddhi.
Katamo cānanda, iddhipādo? Yo, ānanda, maggo yā paṭipadā iddhilābhāya iddhipaṭilābhāya saṁvattati— ayaṁ vuccatānanda, iddhipādo.
Katamā cānanda, iddhipādabhāvanā? vri:27.357 Idhānanda, bhikkhu chandasamādhippadhānasaṅkhārasamannāgataṁ iddhipādaṁ bhāveti, vīriyasamādhi …pe… cittasamādhi … vīmaṁsāsamādhippadhānasaṅkhārasamannāgataṁ iddhipādaṁ bhāveti— ayaṁ vuccatānanda, iddhipādabhāvanā.
Katamā cānanda, iddhipādabhāvanāgāminī paṭipadā? Ayameva ariyo aṭṭhaṅgiko maggo, seyyathidaṁ— sammādiṭṭhi …pe… sammāsamādhi— ayaṁ vuccatānanda, iddhipādabhāvanāgāminī paṭipadā”ti. Sattamaṁ.