Saṁyutta Nikāya 8.12 1. Vaṅgīsavagga

id: sn8.12 VRI: vol 23 สยามรัฐ: vol 15 34 segments

Saṁyutta Nikāya 8.12 1. Vaṅgīsavagga Vaṅgīsasutta

Ekaṁ samayaṁ āyasmā vaṅgīso sāvatthiyaṁ viharati jetavane anāthapiṇḍikassa ārāme. vri:23.227 Tena kho pana samayena āyasmā vaṅgīso aciraarahattappatto hutvā vimuttisukhaṁ paṭisaṁvedī tāyaṁ velāyaṁ imā gāthāyo abhāsi:

“Kāveyyamattā vicarimha pubbe, Gāmā gāmaṁ purā puraṁ; Athaddasāma sambuddhaṁ, Saddhā no upapajjatha.

So me dhammamadesesi, khandhāyatanadhātuyo; Tassāhaṁ dhammaṁ sutvāna, pabbajiṁ anagāriyaṁ.

Bahunnaṁ vata atthāya, bodhiṁ ajjhagamā muni; Bhikkhūnaṁ bhikkhunīnañca, ye niyāmagataddasā.

Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ.

Pubbenivāsaṁ jānāmi, Dibbacakkhuṁ visodhitaṁ; Tevijjo iddhipattomhi, Cetopariyāyakovido”ti.

Tassuddānaṁ Nikkhantaṁ arati ceva, sya:15.289 pesalā atimaññanā; Ānandena subhāsitā, sāriputtapavāraṇā; Parosahassaṁ koṇḍañño, moggallānena gaggarā; Vaṅgīsena dvādasāti. Vaṅgīsasaṁyuttaṁ samattaṁ.