Saṁyutta Nikāya 9.2 1. Vanavagga
id: sn9.2 VRI: vol 23 สยามรัฐ: vol 15 30 segments
Saṁyutta Nikāya 9.2 1. Vanavagga Upaṭṭhānasutta
Ekaṁ samayaṁ aññataro bhikkhu kosalesu viharati aññatarasmiṁ vanasaṇḍe. vri:23.229 Tena kho pana samayena so bhikkhu divāvihāragato supati. Atha kho yā tasmiṁ vanasaṇḍe adhivatthā devatā tassa bhikkhuno anukampikā atthakāmā taṁ bhikkhuṁ saṁvejetukāmā yena so bhikkhu tenupasaṅkami; upasaṅkamitvā taṁ bhikkhuṁ gāthāhi ajjhabhāsi:
“Uṭṭhehi bhikkhu kiṁ sesi, ko attho supitena te; Āturassa hi kā niddā, sallaviddhassa ruppato.
Yāya saddhāya pabbajito, agārasmānagāriyaṁ; Tameva saddhaṁ brūhehi, mā niddāya vasaṁ gamī”ti.
“Aniccā addhuvā kāmā, yesu mandova mucchito; Baddhesu muttaṁ asitaṁ, kasmā pabbajitaṁ tape.
Chandarāgassa vinayā, avijjāsamatikkamā; Taṁ ñāṇaṁ paramodānaṁ, kasmā pabbajitaṁ tape.
Chetvā avijjaṁ vijjāya, sya:15.292 āsavānaṁ parikkhayā; Asokaṁ anupāyāsaṁ, kasmā pabbajitaṁ tape.
Āraddhavīriyaṁ pahitattaṁ, Niccaṁ daḷhaparakkamaṁ; Nibbānaṁ abhikaṅkhantaṁ, Kasmā pabbajitaṁ tape”ti.