Saṁyutta Nikāya 9.4 1. Vanavagga

id: sn9.4 VRI: vol 23 สยามรัฐ: vol 15 15 segments

Saṁyutta Nikāya 9.4 1. Vanavagga Sambahulasutta

Ekaṁ samayaṁ sambahulā bhikkhū kosalesu viharanti aññatarasmiṁ vanasaṇḍe. sya:15.293 Atha kho te bhikkhū vassaṁvuṭṭhā temāsaccayena cārikaṁ pakkamiṁsu. Atha kho yā tasmiṁ vanasaṇḍe adhivatthā devatā te bhikkhū apassantī paridevamānā tāyaṁ velāyaṁ imaṁ gāthaṁ abhāsi:

“Arati viya mejja khāyati, Bahuke disvāna vivitte āsane; Te cittakathā bahussutā, Kome gotamasāvakā gatā”ti.

Evaṁ vutte, aññatarā devatā taṁ devataṁ gāthāya paccabhāsi:

“Māgadhaṁ gatā kosalaṁ gatā, vri:23.231 Ekacciyā pana vajjibhūmiyā; Magā viya asaṅgacārino, Aniketā viharanti bhikkhavo”ti.