Sutta Nipāta 2.2 Āmagandhasutta
id: snp2.2 VRI: vol 48 สยามรัฐ: vol 25 63 segments
Sutta Nipāta 2.2 Āmagandhasutta
“Sāmākaciṅgūlakacīnakāni ca, sya:25.372 Pattapphalaṁ mūlaphalaṁ gavipphalaṁ; Dhammena laddhaṁ satamasnamānā, Na kāmakāmā alikaṁ bhaṇanti.
Yadasnamāno sukataṁ suniṭṭhitaṁ, Parehi dinnaṁ payataṁ paṇītaṁ; Sālīnamannaṁ paribhuñjamāno, So bhuñjasī kassapa āmagandhaṁ.
Na āmagandho mama kappatīti, Icceva tvaṁ bhāsasi brahmabandhu; Sālīnamannaṁ paribhuñjamāno, Sakuntamaṁsehi susaṅkhatehi; Pucchāmi taṁ kassapa etamatthaṁ, Kathaṁpakāro tava āmagandho”.
“Pāṇātipāto vadhachedabandhanaṁ, vri:48.121 Theyyaṁ musāvādo nikativañcanāni ca; Ajjhenakuttaṁ paradārasevanā, Esāmagandho na hi maṁsabhojanaṁ.
Ye idha kāmesu asaññatā janā, sya:25.373 Rasesu giddhā asucibhāvamassitā; Natthikadiṭṭhī visamā durannayā, Esāmagandho na hi maṁsabhojanaṁ.
Ye lūkhasā dāruṇā piṭṭhimaṁsikā, Mittadduno nikkaruṇātimānino; Adānasīlā na ca denti kassaci, Esāmagandho na hi maṁsabhojanaṁ.
Kodho mado thambho paccupaṭṭhāpanā, Māyā usūyā bhassasamussayo ca; Mānātimāno ca asabbhi santhavo, Esāmagandho na hi maṁsabhojanaṁ.
Ye pāpasīlā iṇaghātasūcakā, Vohārakūṭā idha pāṭirūpikā; Narādhamā yedha karonti kibbisaṁ, Esāmagandho na hi maṁsabhojanaṁ.
Ye idha pāṇesu asaññatā janā, sya:25.374 Paresamādāya vihesamuyyutā; Dussīlaluddā pharusā anādarā, Esāmagandho na hi maṁsabhojanaṁ.
Etesu giddhā viruddhātipātino, Niccuyyutā pecca tamaṁ vajanti ye; Patanti sattā nirayaṁ avaṁsirā, Esāmagandho na hi maṁsabhojanaṁ.
Na macchamaṁsānamanāsakattaṁ, Na naggiyaṁ na muṇḍiyaṁ jaṭājallaṁ; Kharājināni nāggihuttassupasevanā, Ye vāpi loke amarā bahū tapā; Mantāhutī yaññamutūpasevanā, Sodhenti maccaṁ avitiṇṇakaṅkhaṁ.
Sotesu gutto viditindriyo care, Dhamme ṭhito ajjavamaddave rato; Saṅgātigo sabbadukkhappahīno, Na lippati diṭṭhasutesu dhīro”.
Iccetamatthaṁ bhagavā punappunaṁ, Akkhāsi naṁ vedayi mantapāragū; Citrāhi gāthāhi munī pakāsayi, Nirāmagandho asito durannayo.
Sutvāna buddhassa subhāsitaṁ padaṁ, vri:48.122 · sya:25.375 Nirāmagandhaṁ sabbadukkhappanūdanaṁ; Nīcamano vandi tathāgatassa, Tattheva pabbajjamarocayitthāti. Āmagandhasuttaṁ dutiyaṁ.