Sutta Nipāta 3.1 Pabbajjāsutta

0

1

“Pabbajjaṁ kittayissāmi, vri:48.143 yathā pabbaji cakkhumā; Yathā vīmaṁsamāno so, pabbajjaṁ samarocayi.

2

Sambādhoyaṁ gharāvāso, rajassāyatanaṁ iti; Abbhokāsova pabbajjā, iti disvāna pabbaji.

3

Pabbajitvāna kāyena, sya:25.406 pāpakammaṁ vivajjayi; Vacīduccaritaṁ hitvā, ājīvaṁ parisodhayi.

4

Agamā rājagahaṁ buddho, magadhānaṁ giribbajaṁ; Piṇḍāya abhihāresi, ākiṇṇavaralakkhaṇo”.

5

Tamaddasā bimbisāro, pāsādasmiṁ patiṭṭhito; Disvā lakkhaṇasampannaṁ, imamatthaṁ abhāsatha.

6

“Imaṁ bhonto nisāmetha, abhirūpo brahā suci; Caraṇena ca sampanno, yugamattañca pekkhati.

7

Okkhittacakkhu satimā, nāyaṁ nīcakulāmiva; Rājadūtābhidhāvantu, kuhiṁ bhikkhu gamissati”.

8

Te pesitā rājadūtā, piṭṭhito anubandhisuṁ; Kuhiṁ gamissati bhikkhu, kattha vāso bhavissati.

9

Sapadānaṁ caramāno, vri:48.144 guttadvāro susaṁvuto; Khippaṁ pattaṁ apūresi, sampajāno paṭissato.

10

Piṇḍacāraṁ caritvāna, Nikkhamma nagarā muni; Paṇḍavaṁ abhihāresi, Ettha vāso bhavissati.

11

Disvāna vāsūpagataṁ, Tayo dūtā upāvisuṁ; Tesu ekova āgantvā, Rājino paṭivedayi.

12

“Esa bhikkhu mahārāja, Paṇḍavassa puratthato; Nisinno byagghusabhova, Sīhova girigabbhare”.

13

Sutvāna dūtavacanaṁ, sya:25.407 Bhaddayānena khattiyo; Taramānarūpo niyyāsi, Yena paṇḍavapabbato.

14

Sa yānabhūmiṁ yāyitvā, Yānā oruyha khattiyo; Pattiko upasaṅkamma, Āsajja naṁ upāvisi.

15

Nisajja rājā sammodi, Kathaṁ sāraṇīyaṁ tato; Kathaṁ so vītisāretvā, Imamatthaṁ abhāsatha.

16

“Yuvā ca daharo cāsi, Paṭhamuppattiko susu; Vaṇṇārohena sampanno, Jātimā viya khattiyo.

17

Sobhayanto anīkaggaṁ, Nāgasaṅghapurakkhato; Dadāmi bhoge bhuñjassu, Jātiṁ akkhāhi pucchito”.

18

“Ujuṁ janapado rāja, Himavantassa passato; Dhanaviriyena sampanno, Kosalesu niketino.

19

Ādiccā nāma gottena, vri:48.145 Sākiyā nāma jātiyā; Tamhā kulā pabbajitomhi, Na kāme abhipatthayaṁ.

20

Kāmesvādīnavaṁ disvā, Nekkhammaṁ daṭṭhu khemato; Padhānāya gamissāmi, Ettha me rañjatī mano”ti. Pabbajjāsuttaṁ paṭhamaṁ.