Sutta Nipāta 4.3 Duṭṭhaṭṭhakasutta
id: snp4.3 VRI: vol 48 สยามรัฐ: vol 25 35 segments
Sutta Nipāta 4.3 Duṭṭhaṭṭhakasutta
Vadanti ve duṭṭhamanāpi eke, vri:48.201 · sya:25.487 Athopi ve saccamanā vadanti; Vādañca jātaṁ muni no upeti, Tasmā munī natthi khilo kuhiñci.
Sakañhi diṭṭhiṁ kathamaccayeyya, Chandānunīto ruciyā niviṭṭho; Sayaṁ samattāni pakubbamāno, Yathā hi jāneyya tathā vadeyya.
Yo attano sīlavatāni jantu, Anānupuṭṭhova paresa pāva; Anariyadhammaṁ kusalā tamāhu, Yo ātumānaṁ sayameva pāva.
Santo ca bhikkhu abhinibbutatto, Itihanti sīlesu akatthamāno; Tamariyadhammaṁ kusalā vadanti, Yassussadā natthi kuhiñci loke.
Pakappitā saṅkhatā yassa dhammā, sya:25.488 Purakkhatā santi avīvadātā; Yadattani passati ānisaṁsaṁ, Taṁ nissito kuppapaṭiccasantiṁ.
Diṭṭhīnivesā na hi svātivattā, Dhammesu niccheyya samuggahītaṁ; Tasmā naro tesu nivesanesu, Nirassatī ādiyatī ca dhammaṁ.
Dhonassa hi natthi kuhiñci loke, Pakappitā diṭṭhi bhavābhavesu; Māyañca mānañca pahāya dhono, Sa kena gaccheyya anūpayo so.
Upayo hi dhammesu upeti vādaṁ, Anūpayaṁ kena kathaṁ vadeyya; Attā nirattā na hi tassa atthi, Adhosi so diṭṭhimidheva sabbanti. Duṭṭhaṭṭhakasuttaṁ tatiyaṁ.