Sutta Nipāta 4.7 Tissametteyyasutta

0

1

“Methunamanuyuttassa, (iccāyasmā tisso metteyyo) Vighātaṁ brūhi mārisa; Sutvāna tava sāsanaṁ, Viveke sikkhissāmase”.

2

“Methunamanuyuttassa, sya:25.494 (metteyyāti bhagavā) Mussate vāpi sāsanaṁ; Micchā ca paṭipajjati, Etaṁ tasmiṁ anāriyaṁ.

3

Eko pubbe caritvāna, methunaṁ yo nisevati; Yānaṁ bhantaṁva taṁ loke, hīnamāhu puthujjanaṁ.

4

Yaso kitti ca yā pubbe, hāyate vāpi tassa sā; Etampi disvā sikkhetha, methunaṁ vippahātave.

5

Saṅkappehi pareto so, kapaṇo viya jhāyati; Sutvā paresaṁ nigghosaṁ, maṅku hoti tathāvidho.

6

Atha satthāni kurute, paravādehi codito; Esa khvassa mahāgedho, mosavajjaṁ pagāhati.

7

Paṇḍitoti samaññāto, ekacariyaṁ adhiṭṭhito; Athāpi methune yutto, mandova parikissati.

8

Etamādīnavaṁ ñatvā, vri:48.206 Muni pubbāpare idha; Ekacariyaṁ daḷhaṁ kayirā, Na nisevetha methunaṁ.

9

Vivekaññeva sikkhetha, etaṁ ariyānamuttamaṁ; Na tena seṭṭho maññetha, sa ve nibbānasantike.

10

Rittassa munino carato, Kāmesu anapekkhino; Oghatiṇṇassa pihayanti, Kāmesu gadhitā pajā”ti. Tissametteyyasuttaṁ sattamaṁ.