← snp

Sutta Nipāta 4.9 Māgaṇḍiyasutta

id: snp4.9 VRI: vol 48 สยามรัฐ: vol 25 66 segments
Sutta Nipāta 4.9 Māgaṇḍiyasutta
“Disvāna taṇhaṁ aratiṁ ragañca, Nāhosi chando api methunasmiṁ; Kimevidaṁ muttakarīsapuṇṇaṁ, Pādāpi naṁ samphusituṁ na icche”.
“Etādisañce ratanaṁ na icchasi, Nāriṁ narindehi bahūhi patthitaṁ; Diṭṭhigataṁ sīlavataṁ nu jīvitaṁ, Bhavūpapattiñca vadesi kīdisaṁ”.
“Idaṁ vadāmīti na tassa hoti, (māgaṇḍiyāti bhagavā) Dhammesu niccheyya samuggahītaṁ; Passañca diṭṭhīsu anuggahāya, Ajjhattasantiṁ pacinaṁ adassaṁ”.
“Vinicchayā yāni pakappitāni, (iti māgaṇḍiyo) Te ve munī brūsi anuggahāya; Ajjhattasantīti yametamatthaṁ, Kathaṁ nu dhīrehi paveditaṁ taṁ”.
“Na diṭṭhiyā na sutiyā na ñāṇena, (māgaṇḍiyāti bhagavā) Sīlabbatenāpi na suddhimāha; Adiṭṭhiyā assutiyā añāṇā, Asīlatā abbatā nopi tena; Ete ca nissajja anuggahāya, Santo anissāya bhavaṁ na jappe”.
“No ce kira diṭṭhiyā na sutiyā na ñāṇena, (iti māgaṇḍiyo) Sīlabbatenāpi na suddhimāha; Adiṭṭhiyā assutiyā añāṇā, Asīlatā abbatā nopi tena; Maññāmahaṁ momuhameva dhammaṁ, Diṭṭhiyā eke paccenti suddhiṁ”.
“Diṭṭhañca nissāya anupucchamāno, (māgaṇḍiyāti bhagavā) Samuggahītesu pamohamāgā; Ito ca nāddakkhi aṇumpi saññaṁ, Tasmā tuvaṁ momuhato dahāsi.
Samo visesī uda vā nihīno, Yo maññati so vivadetha tena; Tīsu vidhāsu avikampamāno, Samo visesīti na tassa hoti.
Saccanti so brāhmaṇo kiṁ vadeyya, Musāti vā so vivadetha kena; Yasmiṁ samaṁ visamaṁ vāpi natthi, Sa kena vādaṁ paṭisaṁyujeyya.
Okaṁ pahāya aniketasārī, Gāme akubbaṁ muni santhavāni; Kāmehi ritto apurakkharāno, Kathaṁ na viggayha janena kayirā.
Yehi vivitto vicareyya loke, Na tāni uggayha vadeyya nāgo; Jalambujaṁ kaṇḍakavārijaṁ yathā, Jalena paṅkena canūpalittaṁ; Evaṁ munī santivādo agiddho, Kāme ca loke ca anūpalitto.
Na vedagū diṭṭhiyāyako na mutiyā, Sa mānameti na hi tammayo so; Na kammunā nopi sutena neyyo, Anūpanīto sa nivesanesu.
Saññāvirattassa na santi ganthā, Paññāvimuttassa na santi mohā; Saññañca diṭṭhiñca ye aggahesuṁ, Te ghaṭṭayantā vicaranti loke”ti. Māgaṇḍiyasuttaṁ navamaṁ.