Theragāthā 4.11 Catukkanipāta
id: thag4.11 VRI: vol 56 สยามรัฐ: vol 26 21 segments
Theragāthā 4.11 Catukkanipāta Paṭhamavagga Sappakattheragāthā
“Yadā balākā sucipaṇḍaracchadā, Kāḷassa meghassa bhayena tajjitā; Palehiti ālayamālayesinī, Tadā nadī ajakaraṇī rameti maṁ.
Yadā balākā suvisuddhapaṇḍarā, vri:56.213 Kāḷassa meghassa bhayena tajjitā; Pariyesati leṇamaleṇadassinī, Tadā nadī ajakaraṇī rameti maṁ.
Kaṁ nu tattha na ramenti, jambuyo ubhato tahiṁ; Sobhenti āpagākūlaṁ, mama leṇassa pacchato.
Tāmatamadasaṅghasuppahīnā, sya:26.316 Bhekā mandavatī panādayanti; ‘Nājja girinadīhi vippavāsasamayo, Khemā ajakaraṇī sivā surammā’”ti. … Sappako thero ….