Theragāthā 4.6 Catukkanipāta
id: thag4.6 VRI: vol 56 สยามรัฐ: vol 26 21 segments
Theragāthā 4.6 Catukkanipāta Paṭhamavagga Senakattheragāthā
“Svāgataṁ vata me āsi, vri:56.211 gayāyaṁ gayaphagguyā; Yaṁ addasāsiṁ sambuddhaṁ, desentaṁ dhammamuttamaṁ.
Mahappabhaṁ gaṇācariyaṁ, sya:26.313 aggapattaṁ vināyakaṁ; Sadevakassa lokassa, jinaṁ atuladassanaṁ.
Mahānāgaṁ mahāvīraṁ, mahājutimanāsavaṁ; Sabbāsavaparikkhīṇaṁ, satthāramakutobhayaṁ.
Cirasaṅkiliṭṭhaṁ vata maṁ, diṭṭhisandānabandhitaṁ; Vimocayi so bhagavā, sabbaganthehi senakan”ti. … Senako thero ….