Theragāthā 6.14 Chakkanipāta
id: thag6.14 VRI: vol 56 สยามรัฐ: vol 26 41 segments
Theragāthā 6.14 Chakkanipāta Paṭhamavagga Sabbakāmittheragāthā
“Dvipādakoyaṁ asuci, duggandho parihīrati; Nānākuṇapaparipūro, vissavanto tato tato.
Migaṁ nilīnaṁ kūṭena, vri:56.227 baḷiseneva ambujaṁ; Vānaraṁ viya lepena, bādhayanti puthujjanaṁ.
Rūpā saddā rasā gandhā, sya:26.336 phoṭṭhabbā ca manoramā; Pañca kāmaguṇā ete, itthirūpasmi dissare.
Ye etā upasevanti, rattacittā puthujjanā; Vaḍḍhenti kaṭasiṁ ghoraṁ, ācinanti punabbhavaṁ.
Yo cetā parivajjeti, sappasseva padā siro; Somaṁ visattikaṁ loke, sato samativattati.
Kāmesvādīnavaṁ disvā, nekkhammaṁ daṭṭhu khemato; Nissaṭo sabbakāmehi, patto me āsavakkhayo”ti. … Sabbakāmitthero …. Chakkanipāto niṭṭhito.
Tatruddānaṁ Uruveḷakassapo ca, thero tekicchakāri ca; Mahānāgo ca kullo ca, mālukyo sappadāsako; Kātiyāno migajālo, jento sumanasavhayo; Nhātamuni brahmadatto, sirimaṇḍo sabbakāmī ca; Gāthāyo caturāsīti, therā cettha catuddasāti.