Theragāthā 7.2 Sattakanipāta

id: thag7.2 VRI: vol 56 สยามรัฐ: vol 26 33 segments

Theragāthā 7.2 Sattakanipāta Paṭhamavagga Lakuṇḍakabhaddiyattheragāthā

“Pare ambāṭakārāme, vanasaṇḍamhi bhaddiyo; Samūlaṁ taṇhamabbuyha, tattha bhaddova jhāyati.

Ramanteke mudiṅgehi, sya:26.338 vīṇāhi paṇavehi ca; Ahañca rukkhamūlasmiṁ, rato buddhassa sāsane.

Buddho ce me varaṁ dajjā, so ca labbhetha me varo; Gaṇhehaṁ sabbalokassa, niccaṁ kāyagataṁ satiṁ.

Ye maṁ rūpena pāmiṁsu, ye ca ghosena anvagū; Chandarāgavasūpetā, na maṁ jānanti te janā.

Ajjhattañca na jānāti, vri:56.229 bahiddhā ca na passati; Samantāvaraṇo bālo, sa ve ghosena vuyhati.

Ajjhattañca na jānāti, bahiddhā ca vipassati; Bahiddhā phaladassāvī, sopi ghosena vuyhati.

Ajjhattañca pajānāti, bahiddhā ca vipassati; Anāvaraṇadassāvī, na so ghosena vuyhatī”ti. … Lakuṇḍakabhaddiyo thero ….