Theragāthā 8.1 Aṭṭhakanipāta

id: thag8.1 VRI: vol 56 สยามรัฐ: vol 26 39 segments

Theragāthā 8.1 Aṭṭhakanipāta Paṭhamavagga Mahākaccāyanattheragāthā

“Kammaṁ bahukaṁ na kāraye, vri:56.232 Parivajjeyya janaṁ na uyyame; So ussukko rasānugiddho, Atthaṁ riñcati yo sukhādhivāho.

Paṅkoti hi naṁ avedayuṁ, Yāyaṁ vandanapūjanā kulesu; Sukhumaṁ sallaṁ durubbahaṁ, Sakkāro kāpurisena dujjaho.

Na parassupanidhāya, kammaṁ maccassa pāpakaṁ; Attanā taṁ na seveyya, kammabandhū hi mātiyā.

Na pare vacanā coro, na pare vacanā muni; Attā ca naṁ yathāvedi, devāpi naṁ tathā vidū.

Pare ca na vijānanti, sya:26.342 mayamettha yamāmase; Ye ca tattha vijānanti, tato sammanti medhagā.

Jīvate vāpi sappañño, api vittaparikkhayo; Paññāya ca alābhena, vittavāpi na jīvati.

Sabbaṁ suṇāti sotena, sabbaṁ passati cakkhunā; Na ca diṭṭhaṁ sutaṁ dhīro, sabbaṁ ujjhitumarahati.

Cakkhumāssa yathā andho, sotavā badhiro yathā; Paññavāssa yathā mūgo, balavā dubbaloriva; Atha atthe samuppanne, sayetha matasāyikan”ti. … Mahākaccāyano thero ….