Aṅguttara Nikāya 4.91 10. Asuravagga
id: an4.91 VRI: vol 36 สยามรัฐ: vol 21 23 segments
Aṅguttara Nikāya 4.91 10. Asuravagga Asurasutta
“Cattārome, bhikkhave, puggalā santo saṁvijjamānā lokasmiṁ. vri:36.106 Katame cattāro? Asuro asuraparivāro, asuro devaparivāro, devo asuraparivāro, devo devaparivāro.
Kathañca, bhikkhave, puggalo asuro hoti asuraparivāro? Idha, bhikkhave, ekacco puggalo dussīlo hoti pāpadhammo, parisāpissa hoti dussīlā pāpadhammā. Evaṁ kho, bhikkhave, puggalo asuro hoti asuraparivāro.
Kathañca, bhikkhave, puggalo asuro hoti devaparivāro? sya:21.120 Idha, bhikkhave, ekacco puggalo dussīlo hoti pāpadhammo, parisā ca khvassa hoti sīlavatī kalyāṇadhammā. Evaṁ kho, bhikkhave, puggalo asuro hoti devaparivāro.
Kathañca, bhikkhave, puggalo devo hoti asuraparivāro? Idha, bhikkhave, ekacco puggalo sīlavā hoti kalyāṇadhammo, parisā ca khvassa hoti dussīlā pāpadhammā. Evaṁ kho, bhikkhave, puggalo devo hoti asuraparivāro.
Kathañca, bhikkhave, puggalo devo hoti devaparivāro? Idha, bhikkhave, ekacco puggalo sīlavā hoti kalyāṇadhammo, parisāpissa hoti sīlavatī kalyāṇadhammā. Evaṁ kho, bhikkhave, puggalo devo hoti, devaparivāro. Ime kho, bhikkhave, cattāro puggalā santo saṁvijjamānā lokasmin”ti. Paṭhamaṁ.