Aṅguttara Nikāya 4.92 10. Asuravagga
id: an4.92 VRI: vol 36 11 segments
Aṅguttara Nikāya 4.92 10. Asuravagga Paṭhamasamādhisutta
“Cattārome, bhikkhave, puggalā santo saṁvijjamānā lokasmiṁ. vri:36.107 Katame cattāro? Idha, bhikkhave, ekacco puggalo lābhī hoti ajjhattaṁ cetosamathassa, na lābhī adhipaññādhammavipassanāya. Idha pana, bhikkhave, ekacco puggalo lābhī hoti adhipaññādhammavipassanāya, na lābhī ajjhattaṁ cetosamathassa. Idha pana, bhikkhave, ekacco puggalo na ceva lābhī hoti ajjhattaṁ cetosamathassa na ca lābhī adhipaññādhammavipassanāya. Idha pana, bhikkhave, ekacco puggalo lābhī ceva hoti ajjhattaṁ cetosamathassa lābhī ca adhipaññādhammavipassanāya. Ime kho, bhikkhave, cattāro puggalā santo saṁvijjamānā lokasmin”ti. Dutiyaṁ.