Saṁyutta Nikāya 23.34 3. Āyācanavagga
id: sn23.34 VRI: vol 25 สยามรัฐ: vol 17 22 segments
Saṁyutta Nikāya 23.34 3. Āyācanavagga Nirodhadhammasutta
Sāvatthinidānaṁ. Āyasmā rādho bhagavantaṁ etadavoca: “sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
“Yo kho, rādha, nirodhadhammo; tatra te chando pahātabbo, rāgo pahātabbo, chandarāgo pahātabbo. vri:25.186 Ko ca, rādha, nirodhadhammo? Rūpaṁ kho, rādha, nirodhadhammo; tatra te chando pahātabbo …pe… vedanā nirodhadhammo; tatra te chando pahātabbo …pe… saññā nirodhadhammo; tatra te chando pahātabbo …pe… saṅkhārā nirodhadhammo; tatra te chando pahātabbo …pe… viññāṇaṁ nirodhadhammo; tatra te chando pahātabbo …pe… yo kho, rādha, nirodhadhammo; tatra te chando pahātabbo, rāgo pahātabbo, chandarāgo pahātabbo”ti. Āyācanavaggo tatiyo.
Tassuddānaṁ Māro ca māradhammo ca, sya:17.245 Aniccena apare duve; Dukkhena ca duve vuttā, Anattena tatheva ca; Khayavayasamudayaṁ, Nirodhadhammena dvādasāti.