Saṁyutta Nikāya 32.56 1. Valāhakavagga

id: sn32.56 VRI: vol 25 11 segments

Saṁyutta Nikāya 32.56 1. Valāhakavagga Vātavalāhakasutta

Sāvatthinidānaṁ. vri:25.254 Ekamantaṁ nisinno kho so bhikkhu bhagavantaṁ etadavoca: “ko nu kho, bhante, hetu, ko paccayo, yenekadā vāto hotī”ti? “Santi, bhikkhu, vātavalāhakā nāma devā. Tesaṁ yadā evaṁ hoti: ‘yannūna mayaṁ sakāya ratiyā vaseyyāmā’ti, tesaṁ taṁ cetopaṇidhimanvāya vāto hoti. Ayaṁ kho, bhikkhu, hetu, ayaṁ paccayo, yenekadā vāto hotī”ti. Chappaññāsamaṁ.