Saṁyutta Nikāya 36.1 1. Sagāthāvagga

id: sn36.1 VRI: vol 26 สยามรัฐ: vol 18 16 segments

Saṁyutta Nikāya 36.1 1. Sagāthāvagga Samādhisutta

“Tisso imā, bhikkhave, vedanā. vri:26.202 · sya:18.254 Katamā tisso? Sukhā vedanā, dukkhā vedanā, adukkhamasukhā vedanā— imā kho, bhikkhave, tisso vedanāti.

Samāhito sampajāno, sato buddhassa sāvako; Vedanā ca pajānāti, vedanānañca sambhavaṁ.

Yattha cetā nirujjhanti, maggañca khayagāminaṁ; Vedanānaṁ khayā bhikkhu, nicchāto parinibbuto”ti. Paṭhamaṁ.