Saṁyutta Nikāya 37.6 1. Paṭhamapeyyālavagga
id: sn37.6 สยามรัฐ: vol 18 8 segments
Saṁyutta Nikāya 37.6 1. Paṭhamapeyyālavagga Upanāhīsutta
“Pañcahi, anuruddha, dhammehi samannāgato mātugāmo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati. sya:18.299 Katamehi pañcahi? Assaddho ca hoti, ahiriko ca hoti, anottappī ca hoti, upanāhī ca hoti, duppañño ca hoti— imehi kho, anuruddha, pañcahi dhammehi samannāgato mātugāmo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjatī”ti. Chaṭṭhaṁ.