Sutta Nipāta 5.2 Ajitamāṇavapucchā
id: snp5.2 VRI: vol 48 สยามรัฐ: vol 25 42 segments
Sutta Nipāta 5.2 Ajitamāṇavapucchā
“Kenassu nivuto loko, vri:48.231 (iccāyasmā ajito) Kenassu nappakāsati; Kissābhilepanaṁ brūsi, Kiṁsu tassa mahabbhayaṁ”.
“Avijjāya nivuto loko, (ajitāti bhagavā) Vevicchā pamādā nappakāsati; Jappābhilepanaṁ brūmi, Dukkhamassa mahabbhayaṁ”.
“Savanti sabbadhi sotā, (iccāyasmā ajito) Sotānaṁ kiṁ nivāraṇaṁ; Sotānaṁ saṁvaraṁ brūhi, Kena sotā pidhiyyare”.
“Yāni sotāni lokasmiṁ, (ajitāti bhagavā) Sati tesaṁ nivāraṇaṁ; Sotānaṁ saṁvaraṁ brūmi, Paññāyete pidhiyyare”.
“Paññā ceva sati yañca, sya:25.531 (iccāyasmā ajito) Nāmarūpañca mārisa; Etaṁ me puṭṭho pabrūhi, Katthetaṁ uparujjhati”.
“Yametaṁ pañhaṁ apucchi, ajita taṁ vadāmi te; Yattha nāmañca rūpañca, asesaṁ uparujjhati; Viññāṇassa nirodhena, etthetaṁ uparujjhati”.
“Ye ca saṅkhātadhammāse, ye ca sekhā puthū idha; Tesaṁ me nipako iriyaṁ, puṭṭho pabrūhi mārisa”.
“Kāmesu nābhigijjheyya, vri:48.232 Manasānāvilo siyā; Kusalo sabbadhammānaṁ, Sato bhikkhu paribbaje”ti. Ajitamāṇavapucchā paṭhamā.