Theragāthā 11.1 Ekādasakanipāta

0

Theragāthā 11.1 Ekādasakanipāta Paṭhamavagga Saṅkiccattheragāthā

1

“Kiṁ tavattho vane tāta, vri:56.242 · sya:26.356 ujjuhānova pāvuse; Verambhā ramaṇīyā te, paviveko hi jhāyinaṁ”.

2

“Yathā abbhāni verambho, vāto nudati pāvuse; Saññā me abhikiranti, vivekapaṭisaññutā.

3

Apaṇḍaro aṇḍasambhavo, Sīvathikāya niketacāriko; Uppādayateva me satiṁ, Sandehasmiṁ virāganissitaṁ.

4

Yañca aññe na rakkhanti, yo ca aññe na rakkhati; Sa ve bhikkhu sukhaṁ seti, kāmesu anapekkhavā.

5

Acchodikā puthusilā, gonaṅgulamigāyutā; Ambusevālasañchannā, te selā ramayanti maṁ.

6

Vasitaṁ me araññesu, kandarāsu guhāsu ca; Senāsanesu pantesu, vāḷamiganisevite.

7

‘Ime haññantu vajjhantu, dukkhaṁ pappontu pāṇino’; Saṅkappaṁ nābhijānāmi, anariyaṁ dosasaṁhitaṁ.

8

Pariciṇṇo mayā satthā, kataṁ buddhassa sāsanaṁ; Ohito garuko bhāro, bhavanetti samūhatā.

9

Yassa catthāya pabbajito, agārasmānagāriyaṁ; So me attho anuppatto, sabbasaṁyojanakkhayo.

10

Nābhinandāmi maraṇaṁ, sya:26.357 nābhinandāmi jīvitaṁ; Kālañca paṭikaṅkhāmi, nibbisaṁ bhatako yathā.

11

Nābhinandāmi maraṇaṁ, vri:56.243 nābhinandāmi jīvitaṁ; Kālañca paṭikaṅkhāmi, sampajāno patissato”ti. … Saṅkicco thero … Ekādasakanipāto niṭṭhito.

12

Tatruddānaṁ Saṅkiccathero ekova, katakicco anāsavo; Ekādasanipātamhi, gāthā ekādaseva cāti.