Theragāthā 12.1 Dvādasakanipāta

0

Theragāthā 12.1 Dvādasakanipāta Paṭhamavagga Sīlavattheragāthā

1

“Sīlamevidha sikkhetha, vri:56.244 asmiṁ loke susikkhitaṁ; Sīlañhi sabbasampattiṁ, upanāmeti sevitaṁ.

2

Sīlaṁ rakkheyya medhāvī, patthayāno tayo sukhe; Pasaṁsaṁ vittilābhañca, pecca sagge pamodanaṁ.

3

Sīlavā hi bahū mitte, saññamenādhigacchati; Dussīlo pana mittehi, dhaṁsate pāpamācaraṁ.

4

Avaṇṇañca akittiñca, dussīlo labhate naro; Vaṇṇaṁ kittiṁ pasaṁsañca, sadā labhati sīlavā.

5

Ādi sīlaṁ patiṭṭhā ca, sya:26.358 kalyāṇānañca mātukaṁ; Pamukhaṁ sabbadhammānaṁ, tasmā sīlaṁ visodhaye.

6

Velā ca saṁvaraṁ sīlaṁ, cittassa abhihāsanaṁ; Titthañca sabbabuddhānaṁ, tasmā sīlaṁ visodhaye.

7

Sīlaṁ balaṁ appaṭimaṁ, sīlaṁ āvudhamuttamaṁ; Sīlamābharaṇaṁ seṭṭhaṁ, sīlaṁ kavacamabbhutaṁ.

8

Sīlaṁ setu mahesakkho, sīlaṁ gandho anuttaro; Sīlaṁ vilepanaṁ seṭṭhaṁ, yena vāti disodisaṁ.

9

Sīlaṁ sambalamevaggaṁ, sīlaṁ pātheyyamuttamaṁ; Sīlaṁ seṭṭho ativāho, yena yāti disodisaṁ.

10

Idheva nindaṁ labhati, peccāpāye ca dummano; Sabbattha dummano bālo, sīlesu asamāhito.

11

Idheva kittiṁ labhati, pecca sagge ca summano; Sabbattha sumano dhīro, sīlesu susamāhito.

12

Sīlameva idha aggaṁ, vri:56.245 paññavā pana uttamo; Manussesu ca devesu, sīlapaññāṇato jayan”ti. … Sīlavo thero ….