Theragāthā 6.1 Chakkanipāta
id: thag6.1 VRI: vol 56 สยามรัฐ: vol 26 29 segments
Theragāthā 6.1 Chakkanipāta Paṭhamavagga Uruveḷakassapattheragāthā
“Disvāna pāṭihīrāni, vri:56.220 gotamassa yasassino; Na tāvāhaṁ paṇipatiṁ, issāmānena vañcito.
Mama saṅkappamaññāya, sya:26.326 codesi narasārathi; Tato me āsi saṁvego, abbhuto lomahaṁsano.
Pubbe jaṭilabhūtassa, yā me siddhi parittikā; Tāhaṁ tadā nirākatvā, pabbajiṁ jinasāsane.
Pubbe yaññena santuṭṭho, kāmadhātupurakkhato; Pacchā rāgañca dosañca, mohañcāpi samūhaniṁ.
Pubbenivāsaṁ jānāmi, dibbacakkhu visodhitaṁ; Iddhimā paracittaññū, dibbasotañca pāpuṇiṁ.
Yassa catthāya pabbajito, agārasmānagāriyaṁ; So me attho anuppatto, sabbasaṁyojanakkhayo”ti. … Uruveḷakassapo thero ….